കോഴിക്കോട്: ദേശീയപാതാ നിർമ്മാണത്തിനായി ചേളന്നൂർ പോഴിക്കാവ് കുന്നിടിച്ച് അശാസ്ത്രീയമായി മണ്ണെടുക്കുന്നതിനെതിരെ പ്രതിഷേധിച്ച ജനപ്രതിനിധികൾക്കും നാട്ടുകാർക്കും പോലീസിന്റെ ക്രൂരമർദ്ദനമേറ്റ സംഭവത്തിൽ മനുഷ്യാവകാശ കമ്മീഷൻ സ്വമേധയാ കേസെടുത്തു.
കോഴിക്കോട് റൂറൽ ജില്ലാ പോലീസ് മേധാവിക്കാണ് കമ്മീഷൻ ജുഡീഷ്യൽ അംഗം കെ.ബൈജുനാഥ് നോട്ടീസയച്ചത്. ഒരാഴ്ച്ചക്കകം അന്വേഷണ റിപ്പോർട്ട് സമർപ്പിക്കണം. ജനുവരി 30 ന് രാവിലെ 10.30 ന് കോഴിക്കോട് ഗവ.ഗസ്റ്റ് ഹൗസിൽ നടക്കുന്ന സിറ്റിംഗിൽ കേസ് പരിഗണിക്കും.
പത്രവാർത്തയുടെ അടിസ്ഥാനത്തിലാണ് കമ്മീഷൻ സ്വമേധയാ കേസെടുത്തത്. സ്ത്രീകൾ ഉൾപ്പെടെ 9 പേർക്ക് പരിക്കേറ്റതായി മനസിലാക്കുന്നു. പ്രകോപനമൊന്നുമില്ലാതെയാണ് പോലീസ് മർദ്ദിച്ചതെന്ന് ജനകീയ സമിതി ആരോപിച്ചു. മർദ്ദനമേറ്റ് നിലത്തുവീണ പഞ്ചായത്ത് സ്ഥിരം സമിതി അധ്യക്ഷൻ പി.സുരേഷ്കുമാറിനെ പോലീസ് റോഡിലൂടെ വലിച്ചിഴച്ചതായി പരാതിയുണ്ട്. സ്ത്രീകളെ പുരുഷൻമാരായ പോലീസ് ഉദ്യോഗസ്ഥർ മർദ്ദിച്ചതായും പരാതിയുണ്ട്.
