കൊച്ചി:തിയ്യേറ്ററിൽ പോയി സിനിമ കാണാൻ കഴിയാത്തവർക്ക് ഏറ്റവും മികച്ചൊരു പ്ലാറ്റ്ഫോമാണ് ഒടിടി.പലരും ഒടിടി റിലീസിന് വേണ്ടി കാത്തിരിക്കുന്നവരാണ്.അതുകൊണ്ട് തന്നെ ഇന്ത്യയില്‍ ഒടിടിയില്‍ സിനിമകളും വീഡിയോകളും കാണുന്നവരുടെ എണ്ണം കൂടുകയാണ്.കഴിഞ്ഞമാസത്തോടെ ഒടിടി പ്രേക്ഷകരുടെ എണ്ണം 60.12 കോടിയായി.ഇത് ജനസംഖ്യയുടെ 41 ശതമാനത്തോളം വരും.ഈ വര്‍ഷം പ്രേക്ഷകരുടെ വളര്‍ച്ചനിരക്ക് 10 ശതമാനത്തോളമാണ്.രാജ്യത്തെ വലിയ പഠനങ്ങളിലൊന്നായ ദി ഓര്‍മാക്‌സ് ഒടിടി ഓഡിയന്‍സ് റിപ്പോര്‍ട്ട് പ്രകാരമുള്ളതാണ് ഈ കണക്കുകള്‍.
2021-ല്‍ 35.32 കോടി പ്രേക്ഷകരാണുണ്ടായിരുന്നത്. തൊട്ടടുത്തവര്‍ഷം 20 ശതമാനത്തോളം വളര്‍ച്ച രേഖപ്പെടുത്തി 42.38 കോടിയായി ഉയര്‍ന്നിരുന്നു. 2024-ലാണ് 50 കോടി കടന്നത്.കഴിഞ്ഞവര്‍ഷം വിപണിവരുമാനം 37,940 കോടി രൂപയിലെത്തി. ഇതില്‍ 23,340 കോടി രൂപ പരസ്യവരുമാനവും 14,500 കോടി രൂപ സബ്സ്‌ക്രിപ്ഷന്‍ വരുമാനവുമായിരുന്നു.
more news:ബൈക്കുകളിൽ പറന്നെത്തുന്ന സ്‌കൂൾവിദ്യാർത്ഥികളെ പൂട്ടാൻ മോട്ടോർവാഹന വകുപ്പ്
കഴിഞ്ഞവാരത്തില്‍ ഒടിടിയില്‍ ഏറ്റവും കൂടുതല്‍പ്പേര്‍ കണ്ട അഞ്ച് ഇന്ത്യന്‍ സിനിമകളുടെ പട്ടികയില്‍ ഒന്നാമതുള്ളത് ‘കാന്താര’യാണ്.41 ലക്ഷം പേര്‍. ഹിന്ദിയും മറാഠിയും ബംഗാളിയും അടക്കം ഏഴുഭാഷകളില്‍ സ്ട്രീമിങ്ങിന് എത്തിയ മലയാളചിത്രം ‘ലോക’യാണ് ഈ പട്ടികയില്‍ രണ്ടാംസ്ഥാനത്തുള്ളത്.40 ലക്ഷം പേരാണ് ‘ലോക’ കണ്ടത്.ഒക്ടോബര്‍ 31-ന് ജിയോ ഹോട്ട്സ്റ്റാറില്‍ സ്ട്രീമിങ് ആരംഭിച്ച ചിത്രത്തിന് ഒടിടിയിലും ഗംഭീര പ്രതികരണവും സ്വീകരണവുമാണ് പ്രേക്ഷകരില്‍നിന്ന് ലഭിക്കുന്നത്. തീയേറ്ററുകളില്‍ റെക്കോര്‍ഡുകള്‍ തകര്‍ക്കുന്ന വിജയം സ്വന്തമാക്കിയ ‘ലോക’ മലയാള സിനിമാ ചരിത്രത്തില്‍ ആദ്യമായി 300 കോടി ക്ലബില്‍ ഇടം പിടിച്ച ചിത്രം കൂടിയാണ്. കേരളത്തില്‍നിന്ന് മാത്രം 121 കോടിക്ക് മുകളില്‍ കളക്ഷന്‍ നേടിയ ചിത്രം, ഇന്ത്യയില്‍നിന്ന് ഏറ്റവും കൂടുതല്‍ കലക്ഷന്‍ വാരിയ മലയാള ചിത്രമായും മാറിയിരുന്നു.
അതിഗംഭീര പ്രൊഡക്ഷന്‍ നിലവാരവും അന്താരാഷ്ട്ര ചിത്രങ്ങളോട് കിടപിടിക്കുന്ന മേക്കിങ്ങുമുള്ള ചിത്രം, അഞ്ചുഭാഗങ്ങള്‍ ഉള്ള ഒരു മെഗാ ഫാന്റസി സിനിമാറ്റിക് യൂണിവേഴ്‌സിലെ ആദ്യ ഭാഗമായാണ് എത്തിയത്.
