തിരുവനന്തപുരം: തദ്ദേശ തിരഞ്ഞെടുപ്പിന് മുന്നോടിയായി പ്രകടന പത്രിക പുറത്തിറക്കിയിരിക്കുകയാണ് എൽഡിഎഫ്.എല്ലാവർക്കും ക്ഷേമവും വികസനവും എന്ന കാഴ്ചപ്പാടിലൂന്നിയാണ് എൽഡിഎഫ് പ്രകടന പത്രിക മുന്നോട്ട് വെച്ചിരിക്കുന്നത്.കേവല ദാരിദ്ര്യം പൂർണ്ണമായും നിർമ്മാർജ്ജനം ചെയ്യൽ,ലൈഫ് മിഷൻ പദ്ധതിയിലൂടെ അവശേഷിക്കുന്നവർക്ക് വരുന്ന 5 വർഷം കൊണ്ട് വീട് നിർമ്മാണം, കേരളത്തെ സമ്പൂർണ്ണ പോഷകാഹാര സംസ്ഥാനമാക്കി മാറ്റൽ, സ്ത്രീകൾക്ക് 20 ലക്ഷം തൊഴിലവസരങ്ങൾ തുടങ്ങി നിരവധി വാഗ്ദാനങ്ങളാണ് ഇടതുപക്ഷം മുന്നോട്ട് വെയ്ക്കുന്നത്.എകെജി സെന്ററിൽ നടന്ന ചടങ്ങിൽ സിപിഐ എം സംസ്ഥാന സെക്രട്ടറി സ. എം വി ഗോവിന്ദൻ മാസ്റ്റർ, എൽഡിഎഫ് കൺവീനർ സ. ടി പി രാമകൃഷ്ണൻ എന്നിവർ ഉൾപ്പെടെയുള്ള എൽഡിഎഫ് നേതാക്കൾ ചേർന്നാണ് തെരഞ്ഞെടുപ്പ് പ്രകടന പത്രിക പ്രകാശനം ചെയ്തത്.കേരളത്തിന്റെ ഇതുവരെയുളള നേട്ടങ്ങളെ കൂടുതൽ ഉയരത്തിൽ എത്തിക്കാനുളള കർമ്മപദ്ധതിയാണ് പ്രകടന പത്രികയെന്ന് മുഖ്യമന്ത്രി പിണറായി വിജയൻ ഫേസ്ബുക്കിൽ കുറിച്ചു.
more news:തിരുവമ്പാടിയിൽ മുസ്ലിം ലീഗ് വിമതർ സ്ഥാനാർഥികളെ പ്രഖ്യാപിച്ചു : എൽ.ഡി.എഫ് പിന്തുണയോടെയാണ് മത്സരം
അതേ സമയം സംസ്ഥാന സര്‍ക്കാര്‍ നല്‍കുന്ന സാമൂഹിക സുരക്ഷാ പെന്‍ഷന്‍ കുടിശ്ശിക ഉള്‍പ്പെടെ ഉടന്‍ അര്‍ഹരിലേക്ക് എത്തുകയാണ്.വ്യാഴാഴ്ച മുതല്‍ ഓരോ പെന്‍ഷന്‍കാര്‍ക്കും 3600 രൂപ വീതം കൈകളിലെത്തും. കുടിശ്ശിക ഇനത്തില്‍ നല്‍കാനുണ്ടായിരുന്ന 1600 രൂപയും പുതുക്കിയ പെന്‍ഷന്‍ തുകയായ 2000 രൂപയും ചേര്‍ത്താണ് നല്‍കുന്നത്.നേരത്തെ 1600 രൂപയാണ് പെന്‍ഷനായി നല്‍കിയിരുന്നത്. നവംബര്‍ മുതല്‍ 400 കൂടി വര്‍ധിപ്പിച്ച് പെന്‍ഷന്‍ 2000 രൂപയാക്കിയിരുന്നു. തദ്ദേശ തിരഞ്ഞെടുപ്പിന് തൊട്ടുമുമ്പ്, നിയമസഭാ തിരഞ്ഞെടുപ്പ് അടുത്തുവരവെ പെന്‍ഷന്‍ തുക കൂട്ടിയത് രാഷ്ട്രീയ ലക്ഷ്യത്തോടെയാണ് എന്നാണ് പ്രതിപക്ഷത്തിന്റെ വിലയിരുത്തല്‍. 2500 രൂപയാക്കി ഉയര്‍ത്തുമെന്ന് ഇടതുപക്ഷം നല്‍കിയ വാഗ്ദാനവും അവര്‍ ഓര്‍മിപ്പിക്കുന്നു.3600 രൂപ ഒരുമിച്ച് ലഭിച്ചാല്‍ പെന്‍ഷന്‍ ഇനത്തില്‍ ഗുണഭോക്താക്കള്‍ക്ക് കിട്ടേണ്ട മുഴുവന്‍ തുകയും കൈയ്യിലെത്തും. കുടിശ്ശിക ഇല്ലാതെ കാലാവധി പൂര്‍ത്തിയാക്കണം എന്നാണ് സര്‍ക്കാര്‍ തീരുമാനം. പെന്‍ഷന്‍ വിതരണത്തിന് വേണ്ടി 1864 കോടി രൂപ ധനവകുപ്പ് കഴിഞ്ഞ മാസം അവസാനത്തില്‍ അനുവദിച്ചിരുന്നു. സംസ്ഥാനത്ത് മൊത്തം 6377935 പേര്‍ക്കാണ് പെന്‍ഷന്‍ ലഭിക്കുന്നത്. പകുതി പേര്‍ക്ക് ബാങ്ക് അക്കൗണ്ട് വഴിയും മറ്റുള്ളവര്‍ക്ക് വീട്ടിലെത്തിച്ചുമാണ് പെന്‍ഷന്‍ വിതരണം.
