കൊച്ചി:കേരളത്തിലെ ഏറ്റവും വലിയ സാഹിത്യോല്‍സവം ഹോര്‍ത്തൂസിന് കൊച്ചിയില്‍ തിരിതെളിഞ്ഞു. കാര്‍ണിവലിന് നടന്‍ മമ്മൂട്ടി ദീപംതെളിയിച്ചു. കേരളം വൈവിധ്യങ്ങളുടെ ഉദ്യാനമാണെന്നും തനിക്കുവേണ്ടി പ്രാര്‍ഥിച്ചവരെ ഓര്‍ത്തപ്പോള്‍ അത് ബോധ്യമായെന്നും താന്‍ അഹങ്കാരിയെന്ന് പറഞ്ഞവര്‍ വരെ പ്രാര്‍ഥിച്ചുവെന്നും മമ്മൂട്ടി പറഞ്ഞു. ഇതിനിടെ തനിക്ക് ‘മമ്മൂട്ടി’ എന്ന് പേരിട്ട സുഹൃത്തിനെ നടൻ വേദിയിലേക്ക് വിളിച്ചു. എടവനക്കാട് സ്വദേശി ശശിധരനെയാണ് മമ്മൂട്ടി വേദിയിലേക്ക് ക്ഷണിച്ചത്. പലരും താനാണ് ആ പേരിട്ടതെന്ന് അവകാശപ്പെട്ടിരുന്നെന്നും താരം പറഞ്ഞു. അതേസമയം എറണാകുളം സുഭാഷ് പാർക്കും രാജേന്ദ്ര മൈതാനവുമാണ് ഹോർത്തൂസിൻ്റെ വേദികൾ. പൊതുജനങ്ങൾക്ക് പ്രവേശനം സൗജന്യമാണ്. പ്രധാന വേദികളായ അഞ്ചെണ്ണം ഉൾപ്പെടെ 7 വേദികളാണു രാജേന്ദ്ര മൈതാനത്തും സുഭാഷ് പാർക്കിലുമായുള്ളത്.
more news:ശബരിമല സന്നിദാനത്ത് നിയന്ത്രിക്കാനാവാത്ത തിരക്ക് തുടരുന്നു, ഇന്നലെ എത്തിയത് 87493 ഭക്തർ
സംഘകാല സാഹിത്യത്തിൽ കവിതകളെ ഭൂമിശാസ്ത്രപരമായി തരംതിരിച്ച് അവതരിപ്പിച്ച സമ്പ്രദായമായ ‘തിണ’കളിൽ നിന്നാണ് 5 പ്രധാന വേദികളുടെയും പേരുകൾ കടമെടുത്തിരിക്കുന്നത്. കുറിഞ്ചി, മുല്ലൈ, മരുതം, നെയ്തൽ, പാലൈ എന്നിവയാണ് പ്രധാന വേദികളുടെ പേരുകൾ. ആദ്യ ദിനമായ ഇന്നു 47 സെഷനുകൾ വിവിധ വേദികളിലായി നടന്നു.കുട്ടികൾക്കായുള്ള സെഷനുകളും രാവിലെ ആരംഭിച്ചു. ഇന്ററാക്ടീവ് സെഷൻ ‘ഇന്ദൂം കുരുന്നുകളും’ ഹോർത്തൂസ് തിയറ്ററിലും, ബാലരമ ഡൈജസ്റ്റ് ക്വിസ് ചിൽഡ്രൻസ് പവിലിയനിലും രാവിലെ 11ന് നടന്നു.ഹോർത്തൂസിലെത്തുന്നവർക്ക് പ്രധാനമായും മറൈൻഡ്രൈവ് ഗ്രൗണ്ടിലും എറണാകുളത്തപ്പൻ ഗ്രൗണ്ടിലുമാണു പാർക്കിങ് ക്രമീകരിച്ചിട്ടുള്ളത്. രണ്ടിടത്തും 400 വാഹനങ്ങൾ വീതം പാർക്ക് ചെയ്യാനുള്ള സൗകര്യമുണ്ട്.
more news:ഡിസംബർ 6 ന് പ്രമുഖ മാധ്യമപ്രവർത്തകൻ ശ്രീമനോജ് അനുസ്മരണ പരിപാടി സംഘടിപ്പിക്കുന്നു
എറണാകുളത്തപ്പൻ ഗ്രൗണ്ടിൽ പാർക്ക് ചെയ്യുന്നവർക്കു വേദികളിലേക്കു നടന്നെത്താം. വേദികളിൽ നിന്ന് രണ്ടു കിലോമീറ്ററോളം അകലെയുള്ള മറൈൻഡ്രൈവ് ഗ്രൗണ്ടിൽ വാഹനങ്ങൾ പാർക്ക് ചെയ്യുന്നവർക്കായി സൗജന്യ യാത്രാ സംവിധാനം ഒരുക്കിയിട്ടുണ്ട്. 15 ഓട്ടോറിക്ഷകൾ ഇതിനായി ഷട്ടിൽ സർവീസ് നടത്തും. സുഭാഷ് പാർക്കിനു മുന്നിലുള്ള പാർക്കിങ് സ്പേസിൽ ഇരുചക്രവാഹന പാർക്കിങ് മാത്രമേ ഹോർത്തൂസ് ദിനങ്ങളിൽ അനുവദിക്കുകയുള്ളൂ. ഇരുചക്രവാഹനങ്ങളിൽ എത്തുന്നവർക്ക് പാർക്കിനു മുന്നിൽ സൗകര്യപ്രദമായി പാർക്ക് ചെയ്തു വേദികളിലേക്ക് എത്താം. സുഗമമായ പാർക്കിങ്ങിനും ഗതാഗതനിയന്ത്രണത്തിനുമായി ട്രാഫിക് വാർഡൻമാരെയും പാർക്ക് അവന്യൂ റോഡിൽ നിയോഗിച്ചിട്ടുണ്ട്.
