എറണാകുളം : അയ്യപ്പ സംഗമം നടത്തുന്ന ഇടതുപക്ഷത്തെ രൂക്ഷമായി വിമർശിച്ച് ഫാ. അജി പുതിയാപറമ്പിൽ.
*പക്ഷം തെറ്റുന്ന ഇടതുപക്ഷം*
കേരളത്തിലെ ഭരണകൂടവും അതിന് നേതൃത്വം നൽകുന്ന ഇടതുപക്ഷവും യഥാർത്ഥത്തിൽ
ഏത് പക്ഷത്തെയാണ്
പ്രതിനിധീകരിക്കുന്നത് ?
ഏതായാലും അത് ഇടതുപക്ഷത്തെയല്ല എന്നു തോന്നിപ്പിക്കുന്ന നിരവധി സംഭവങ്ങൾ നടന്നു കഴിഞ്ഞു. വിസ്താരഭയം മൂലം അതൊന്നും ഇവിടെ പ്രതിപാദിക്കുന്നില്ല. എന്നാൽ അതിൻ്റെ അവസാനത്തെ ഉദാഹരണമാണ് 2025 സെപ്റ്റംബർ 20 ന് പമ്പാനദീതീരത്ത് നടത്താൻ തീരുമാനിച്ചിരിക്കുന്ന ആഗോള അയ്യപ്പസംഗമം!
ആധുനിക കേരളത്തിൻ്റെ നവോത്ഥാന സങ്കല്പങ്ങൾക്ക് ഊടും പാവും നെയ്തതിൽ ഇടതുപക്ഷത്തിൻ്റെ പങ്ക് നിസ്തർക്കമാണ്. മഹാത്മാ അയ്യങ്കാളിയും ശ്രീനാരായണഗുരുവും അവർണ്ണർക്കും അധ:സ്ഥിതർക്കും വേണ്ടി നെയ്ത സ്വപ്നങ്ങൾ യാഥാർത്ഥ്യമാക്കുന്നതിൽ വലിയ പങ്ക് വഹിച്ചവരാണ് കേരളത്തിലെ ഇടതുപക്ഷക്കാർ. ഇപ്പോഴാകട്ടെ സ്വന്തം പക്ഷം ഏതെന്നുപോലും തിരിച്ചറിയാനാകാത്ത ദുരവസ്ഥയിലാണവർ.
കഷ്ടം!!
അയ്യപ്പസംഗമത്തിൽ രാഷ്ട്രീയമില്ലെന്നും
തിരുവിതാംകൂർ ദേവസ്വം ബോർഡിൻ്റെ 75-ാം വാർഷികത്തോടനുബന്ധിച്ച് നടത്തുന്ന ആഘോഷ പരിപാടി മാത്രമാണെന്നുമാണ് ഭരണകൂട ഭാഷ്യം. എന്നാൽ , അത് അതേപടി വിഴുങ്ങാൻ മാത്രം രാഷ്ട്രീയ അക്ഷരജ്ഞാനമില്ലാത്തവരോ സാമാന്യബോധമില്ലാത്തവരോ അല്ല മലയാളികൾ.
” *എങ്ങനെയും അധികാരം നേടിയെടുക്കുക. ഏത് മാർഗ്ഗം ഉപയോഗിച്ചും അത് നിലനിർത്തുക”* എന്ന മാക്യവെല്ലിയുടെ തത്വചിന്തയാലാണ് ഭരണകൂടം നയിക്കപ്പെടുന്നതെങ്കിൽ , അയ്യപ്പ സംഗമം ഒരിടത്ത് മാത്രമല്ല ഇനിയും ഒരുപാടിടങ്ങളിൽ സംഘടിപ്പിക്കണം.
അധികാരം എങ്ങനെയും നിലനിർത്താൻ
വോട്ട് വില കൊടുത്തു വാങ്ങുകയും വിൽക്കാൻ തയ്യാറാകാത്തവരുടേത് പിടിച്ചുപറിക്കുകയും മോഷ്ടിക്കുകയും ചെയ്യുന്ന ആധുനിക അമൃത ഭാരതത്തിലും മാക്യവെല്ലി തന്നെയാണ് താരം. ഗാന്ധിജിയാകട്ടെ പടിക്ക് പുറത്തും!!!
സംഘപരിവാറിൻ്റെ വിഭജന രാഷ്ട്രീയം പോലെ തന്നെ അപകടകരമാണ് പ്രീണന രാഷ്ട്രീയവുമെന്ന് അറിയാൻ പാടില്ലാത്തവിധം രാഷ്ട്രീയ തിമിരം ബാധിച്ചോ ഇവിടുത്തെ ഇടതുപക്ഷത്തിന്?
ഒരു മതേതര രാജ്യത്തിൻ്റെ ഭരണത്തലവൻ ഒരു മതവിഭാഗത്തിൻ്റെ ആരാധനാലയത്തിൻ്റെ തറക്കല്ലിടുന്നതും പ്രതിഷ്ഠാകർമ്മം നിർവ്വഹിക്കുന്നതും എത്രമാത്രം അനുചിതമാണോ അത്രമാത്രം അനുചിതമാണ് കേരളത്തിൽ സർക്കാർ നേതൃത്വത്തിൽ നടക്കാൻ പോകുന്ന അയ്യപ്പസംഗമവും. സംശയമില്ല.
മതങ്ങളുടെയല്ല മനുഷ്യൻ്റെ ക്ഷേമമായിരിക്കണം ഭരണകൂടത്തിൻ്റെയും രാഷ്ട്രീയത്തിൻ്റെയും ലക്ഷ്യം. *മതത്തിൻ്റെ ക്ഷേമം വിശ്വാസികൾ നോക്കിക്കൊള്ളും.*
ഫാ. അജി പുതിയാപറമ്പിൽ
11-09-2025
