കോഴിക്കോട് : കോഴിക്കോട് ഷോപ്പിങ് ഫെസ്റ്റിവല്’ നടത്തിപ്പ് എങ്ങനെയായിരിക്കണമെന്നതിനെ കുറിച്ച് വിശദപദ്ധതി രേഖ(ഡിപിആര്) തയ്യാറാക്കാന് ഇവന്റ് മാനേജ്മെന്റ് സ്ഥാപനത്തെ ഏല്പ്പിക്കാൻ കോഴിക്കോട് നഗരസഭാ കൗൺസിൽ തീരുമാനം. യുഡിഎഫിന്റെ വിയോജനത്തോടെയാണ് മേയർ ഡോ. ബീനാഫിലിപ്പിന്റെ അധ്യക്ഷതയിൽ ചേര്ന്ന കൗണ്സിൽ യോഗം തീരുമാനമെടുത്തത്.
2025-26 ബജറ്റിലാണ് ഷോപ്പിങ് ഫെസ്റ്റിവൽ പ്രഖ്യാപിച്ചത്. സാങ്കേതിക മികവുള്ള-പ്രാവീണ്യം തെളിയിച്ച നിരവധി ഉദ്യോഗസ്ഥർ കോര്പ്റേഷനിലുള്ളപ്പോൾ എന്തിനാണ് ഡിപിആര് തയ്യാറാക്കാൻ ഇവന്റ് ഗ്രൂപ്പിനെ ഏല്പ്പിക്കുന്നതെന്ന് യുഡിഎഫ് ചോദിച്ചു.
പ്രൊഫഷണലായി നടത്തുന്ന പരിപാടിയാണ് ഷോപ്പിങ് ഫെസ്റ്റിവലെന്നും അത് എങ്ങനെയാകണമെന്നുള്ള രൂപമുണ്ടാക്കുകയാണ് ഇവന്റ് ഗ്രൂപ്പിന്റെ ചുമതലയെന്നും ഡെപ്യൂട്ടി മേയര് സി. പി. മുസാഫര് അഹമ്മദ് പറഞ്ഞു. ഫെസ്റ്റിവൽ നടത്താന് ഖജനാവില്നിന്ന് പണം ചെലവഴിക്കില്ലെന്നും ഈ ഭരണസമിതിക്ക് ശേഷവും ഫെസ്റ്റിവല് നടത്താമല്ലോയെന്നും അദ്ദേഹം പറഞ്ഞു. പക്ഷ ഡിപിആറിന് എത്ര തുകവേണമെന്ന് വ്യക്തമാക്കിയില്ല.
പയ്യാനക്കല് കളിസ്ഥലം യാഥാര്ഥ്യമാക്കാനുള്ള നടപടികളുമായി കോര്പ്പറേഷൻ മുന്നോട്ട്. കളിസ്ഥലത്തിനായുള്ള 1.63 ഏക്കര് ഏറ്റെടുക്കാനായി 12.97 കോടി അനുവദിക്കാന് കൗണ്സിൽ തീരുമാനിച്ചു. പതിറ്റാണ്ടുകളായുള്ള ജനങ്ങളുടെ കാത്തിരിപ്പിന് അവസാനമാകുമെന്ന് കൗണ്സിലര്മാര് വിലയിരുത്തി.
സ്ഥലം കൈയേറിപ്പോയിട്ടുണ്ടെന്നും 1.46 ഏക്കര് മാത്രമേ ഉള്ളൂവെന്നും അക്കാര്യം പരിശോധിക്കണമെന്നും കൗണ്സിലർ എസ്.കെ. അബൂബക്കർ പറഞ്ഞു. സ്ഥലവുമായി ബന്ധപ്പെട്ട് എന്തെങ്കിലും കേസ് നിലനില്ക്കുന്നുണ്ടോയെന്നും അദ്ദേഹം ചോദിച്ചു. റവന്യൂ ഉദ്യോഗസ്ഥരാണ് ഭൂമിയളന്നതെന്നും തഹസില്ദാരാണ് ഭൂവില കണക്കാക്കിയതെന്നും ഡെപ്യൂട്ടി മേയര് പറഞ്ഞു. ഭൂമിയേറ്റെടുക്കലുമായി ബന്ധപ്പെട്ട് കേസൊന്നുമില്ലെന്നും അദ്ദേഹം വിശദീകരിച്ചു.
