സ്കൂളിൽ ഹിജാബ് : കേരളത്തെ വീണ്ടും ഭ്രാന്താലയമാക്കരുത് – ഫാ അജി പതിയാപറമ്പിൽ

*മതവത്ക്കരിക്കപ്പെടുന്ന കേരളം.*                  ‘                            എറണാകുളം :

പള്ളുരുത്തി സെൻ്റ് റീത്താസ് സ്‌കൂളിലെ ഹിജാബ് വിഷയത്തിൽ കേരളം ചിന്തിക്കേണ്ട ചില കാര്യങ്ങളുണ്ട്.

ഒന്നാമതായി മനസ്സിലാക്കേണ്ടത് *കേരളത്തിൻ്റെ പൊതുബോധം ഏറെക്കുറെ പൂർണ്ണമായി മതബോധമായി രുപാന്തരപ്പെട്ടിരിക്കുന്നു* എന്നതാണ്. മലയാളിയുടെ വ്യക്തിജീവിതം മാത്രമല്ല പൊതുജീവിതവും മതാധിഷ്ഠിതമായിരിക്കുന്നു !!!.

കേരളത്തിൻ്റെ രാഷ്ട്രീയ – ഭരണ മണ്ഡലങ്ങൾ പണ്ടേ മതങ്ങളുടെ നിയന്ത്രണത്തിലാണ്. *ആര് ഭരിക്കണമെന്ന് ജനം വോട്ടെടുപ്പിലൂടെ തീരുമാനിക്കും. എന്നാൽ , തെരഞ്ഞെടുക്കപ്പെട്ടവർ എങ്ങനെ ഭരിക്കണമെന്നത് മതങ്ങൾ തീരുമാനിക്കും.* അതായത് കെ.സി.ബി.സി. യും, സമസ്തയും, എസ്. എൻ. ഡി. പി. യും എൻ. എസ്. എസ്. ഉം തീരുമാനിക്കും.

*മതങ്ങൾ അനാവശ്യമാണോ?*
ഒരിക്കലുമല്ല!!! മനുഷ്യൻ്റെ വ്യക്തിജീവിതത്തിലും സമൂഹനിർമ്മിതിയിലും മതങ്ങൾക്ക് വലിയ പങ്കുണ്ട്. എന്നാൽ , അവനെ പൂർണ്ണമായും നിഷ്ഠകൾ കൊണ്ട് നിയന്ത്രിക്കാനുള്ള വ്യാമോഹം മതങ്ങൾ ഉപേക്ഷിക്കണം. ആരാധനാലയങ്ങളിലും മതപഠനശാലകളിലും വീട്ടിലും മാത്രമല്ല പൊതുയിടങ്ങളിലും മതത്തിൻ്റെ അടയാളങ്ങൾ ധരിക്കാൻ ശാഠ്യം പിടിക്കുന്നത് , അല്ലെങ്കിൽ അങ്ങനെയുള്ള മതമനസ്സുകൾ രൂപപ്പെടുത്തുന്നത് തികച്ചും അനാരോഗ്യകരമാണ്.

ഇതിൻ്റെ ഭവിഷ്യത്ത് കൂടുതൽ അനുഭവിക്കേണ്ടി വരിക മതങ്ങൾ തന്നെയായിരിക്കും. *വിശ്വാസിയെ വരിഞ്ഞു മുറുക്കിയിടത്തൊക്കെ അവർ മതമുപേക്ഷിച്ചു.* ചിലർ മതവിരുദ്ധരും മറ്റു ചിലർ നിരീശ്വരവാദികളുമായി. യൂറോപ്പ് മികച്ച ഉദാഹരണമാണ്. കേരളവും സഞ്ചരിക്കുന്നത് അതേ വഴിയിലാണ്.

കഴിഞ്ഞ ദിവസം കൊച്ചിയിൽ നടന്ന യുക്തിവാദികളുടെ സമ്മേളനത്തിൽ ഏഴായിരത്തിലധികം പേരാണ് പങ്കെടുത്തത്.
ഏഴായിരം എന്നത് ഒരു ചെറിയ സംഖ്യയല്ല. ആഗോള തലത്തിലാകട്ടെ, മതമില്ലാത്തവർ 25% ഉം നിരീശ്വരവാദികൾ 10% ഉം ആയിരിക്കുന്നു.

*മതത്തിൻ്റെ മൂല്യങ്ങൾ പഠിപ്പിക്കുകയും പാലിക്കാൻ പ്രേരിപ്പിക്കുകയും ചെയ്യുന്നതിനേക്കാൾ അതിൻ്റെ അടയാളങ്ങൾ വിശ്വാസികളുടെ ശരീരത്തിൽ ധരിപ്പിക്കുന്നതിലാണ് മതനേതാക്കൾക്ക് കൂടുതൽ താല്പര്യം.*

ചില ആചാരങ്ങൾ അധികാരമുപയോഗിച്ച് വിശ്വാസികളിൽ അടിച്ചേല്പിക്കാൻ ശ്രമിച്ചതാണ് സീറോമലബാർ സഭയിൽ വലിയ പ്രശ്നങ്ങൾക്ക് കാരണമായത്. എന്നാൽ , അധ്യാപകരിൽ നിന്നും വിദ്യാർത്ഥികളിൽ നിന്നും കോഴവാങ്ങുന്നതിനെപ്പറ്റിയോ മതമേലധ്യക്ഷൻമാർ അത്യാഡംബര ജീവിതം നയിക്കുന്നതിനെപ്പറ്റിയോ ആർക്കെങ്കിലും എന്തെങ്കിലും ആകുലതയുണ്ടോ? സമാനമാണ് മറ്റു മതങ്ങളിലെ അവസ്ഥയും.

*രണ്ടാമതായി*, ഒരു മതവിഭാഗത്തിലെ വിദ്യാർഥികൾ പ്രാർത്ഥിക്കാൻ പ്രത്യേക സൗകര്യവും യൂണിഫോമിൽ ഇളവും ആവശ്യപ്പെടുമ്പോഴും അത്തരം ആവശ്യങ്ങൾ പൊതുസമൂഹം ഏറ്റെടുക്കുമ്പോഴും കേരളം ശ്രദ്ധിക്കേണ്ട ചില കാര്യങ്ങളുണ്ട്. മുസ്ലിം ലീഗ് നേതാവ് ശ്രീ. കുഞ്ഞാലിക്കുട്ടി പറഞ്ഞതുപോലെ ‘ഒരു ചെറിയ കഷണം തുണിയുടെ’ മാത്രം പ്രശ്നമല്ലിത്. അതിനപ്പുറം കേരളത്തിൻ്റെ സൗഹാർദ്ദാന്തരീക്ഷത്തെ ബാധിക്കുന്ന ഗൗരവതരമായ ചില സംഗതികളുമുണ്ട്.

വിസ്താരഭയത്താൽ ചുരുക്കിപ്പറയാം.
ഇത്തരം സംഭവങ്ങൾ ഉണ്ടാകുമ്പോൾ
മറ്റു വിഭാഗത്തിലുള്ളവർ എന്താണ് ചിന്തിക്കുന്നതെന്ന് അറിയാമോ? ‘തങ്ങളുടെ കുട്ടികളും ഇതുപോലെയാകണം.
നാളെ അവരും പൊതുയിടങ്ങളിൽ മതപരമായ കാര്യങ്ങളിൽ നിർബന്ധം പിടിക്കുന്നവരാകണം. അതിനുതകുന്ന പരിശീലനം നല്കണം.’

നോക്കൂ; കേരളം സഞ്ചരിക്കുന്നത് എങ്ങോട്ടാണെന്ന്???

‘മറ്റു മതസ്ഥർ നല്കുന്ന ഭക്ഷണം കഴിക്കരുതെന്നും പ്രൊഫഷണൽ സേവനങ്ങൾക്ക് ക്രൈസ്തവരെ വിളിക്കുന്നതാണ് അഭികാമ്യമെന്നും’ പരസ്യമായി പറയുന്ന ചില ക്രൈസ്തവ പുരോഹിതരെങ്കിലും ഇന്നുണ്ട്. (മുമ്പ് ഒരു പുരോഹിതനും ഇങ്ങനെ പറയുകയോ, എന്തിന് ചിന്തിക്കുക പോലുമോ ചെയ്തിരുന്നില്ല എന്നോർക്കണം). മറ്റു മതങ്ങളിലും ഇങ്ങനെയുള്ളവരുടെ എണ്ണം കൂടുന്നുണ്ട്. അവർക്ക് വേണ്ട സഹായം നല്കി കേരളത്തെ ഭ്രാന്താലയമാക്കാൻ കാത്തിരിക്കുന്ന ചില സംഘങ്ങളുടെ ശക്തിയും കേരളത്തിൽ വർദ്ധിക്കുന്നുണ്ട്.

ക്ഷമിക്കണം !!!കുറിപ്പ് നീണ്ടുപോയി. ഒരു പരിഹാരം നിർദ്ദേശിച്ചുകൊണ്ട് ചുരുക്കട്ടെ.

*കേരളത്തിൻ്റെ പൊതുയിടങ്ങൾ പൂർണ്ണമായും മതേതരമാകട്ടെ.*

മതങ്ങൾക്ക് സ്വന്തമായി ഒരുപാടിടങ്ങളുണ്ട്. അതുകൊണ്ട് പൊതുയിടങ്ങളിൽ അവ നിർബന്ധം പിടിക്കരുത്.

ഫാ. അജി പുതിയാപറമ്പിൽ
21-10-2025