കോഴിക്കോട്: താമരശ്ശേരി ‘ഫ്രഷ് കട്ട്’ മാലിന്യ സംസ്കരണ കേന്ദ്രം പ്രദേശവാസികളുടെ ജീവിതത്തെ ബാധിക്കാൻ തുടങ്ങിയിട്ട് വർഷങ്ങളായെന്നും, സംസ്കരണ കേന്ദ്രത്തിൽ നിന്നുള്ള അസഹ്യമായ ദുർഗന്ധം കാരണം പ്രദേശത്തെ ആയിരക്കണക്കിന് കുടുംബങ്ങളുടെ ശുദ്ധവായു പോലും നിഷേധിക്കപ്പെടുന്ന അവസ്ഥ അംഗീകരിക്കാൻ സാധിക്കില്ലെന്നും എം കെ രാഘവൻ എം.പി വ്യക്തമാക്കി.
ജനപ്രതിനിധി എന്ന നിലയിൽ വിഷയത്തിൽ നിരവധി തവണ ഇടപെടുകയും, ജില്ലാകളക്ടറെ ഉൾപ്പെടെ നേരിൽ കണ്ട് ജനങ്ങളുടെ ദുരിതം ബോധ്യപ്പെടുത്തിയിരുന്നതായും, ജില്ലാ ഭരണകൂടത്തിന്റെയും, സ്ഥാപന അധികാരികളുടെയും ഭാഗത്ത് നിന്ന് നിസ്സഹകരണ നിലപാടാണ് ഉണ്ടായതെന്നും എം.പി വ്യക്തമാക്കി.
ഫാക്ടറിയിലെ മാലിന്യങ്ങൾ മൂലം സമീപ പ്രദേശത്തെ ശുദ്ധജല സ്രോതസ്സുകൾ മലിനീകരിക്കപ്പെടുന്നുണ്ട്. ഇത് മൂലം പലർക്കും ഗുരുതരമായ ആരോഗ്യപ്രശ്നങ്ങളാണ് ഉണ്ടാവുന്നത്.
ഫാക്ടറിയുടെ പ്രവർത്തനം നിർത്തലാക്കണമെന്ന് ആവശ്യപ്പെട്ട് നാട്ടുകാർ സമാധാനപരമായ നിരവധി സമരങ്ങളും പ്രതിഷേധങ്ങളും വർഷങ്ങളായി നടത്തിവരികയാണ്. ഇതിനൊക്കെ പുല്ലുവില കൽപ്പിച്ചുകൊണ്ട് ജനജീവിതം കൂടുതൽ ദുരിതത്തിലേക്ക് തള്ളിവിടുന്ന ജില്ലാ ഭരണകൂടത്തിന്റെയും, സ്ഥാപന അധികാരികളുടെയും നിലപാട് കൂടിയാണ് സ്ഥിതി ഇത്രത്തോളം വഷളാക്കാൻ ഇടയാക്കിയത്.
കഴിഞ്ഞ ദിവസം നടന്ന സംഭവവികാസങ്ങൾ അപലപനീയമാണ്. എന്നാൽ പ്രദേശവാസികളെ അതിലേക്ക് നയിച്ച കാരണങ്ങൾ കൂടി കണക്കിലെടുക്കേണ്ടതുണ്ടെന്നും, പ്രതിഷേധക്കാർക്കെതിരെ നടന്ന പോലീസ് നടപടി ശക്തമായി അപലപിക്കേണ്ടതാണെന്നും എം.പി വ്യക്തമാക്കി. ജില്ലാ ഭരണകൂടത്തെയും, മലിനീകരണ നിയന്ത്രണ ബോർഡിനെയും നിരവധി തവണ സമീപിച്ചിട്ടും ശാശ്വതമായ പരിഹാരം ഇതുവരെ ഉണ്ടായിട്ടില്ല.
പ്രദേശവാസികളുടെ പ്രശ്നങ്ങൾക്ക് പരിഹാരമുണ്ടാകുക എന്നതിനാണ് ആത്യന്തികമായ പരിഗണന നൽകേണ്ടതെന്നും, പ്രശ്നത്തിൽ പരിഹാരമുണ്ടാക്കാൻ ജില്ലാ ഭരണകൂടം ആത്മാർത്ഥമായി ശ്രമിക്കണമെന്നും, ജനങ്ങളുടെ പ്രശ്നം പരിഹരിക്കപ്പെടുന്നത് വരെ അവർക്ക് പൂർണ്ണ പിന്തുണ നൽകുമെന്നും എം.പി വ്യക്തമാക്കി.
