കോഴിക്കോട് : നടക്കാവ് പോലീസ് സ്റ്റേഷന്‍ പരിധിയിലെ എരഞ്ഞിപ്പാലത്തുള്ള ജിമ്മിൽ നിന്നും മോഷണം നടത്തിയ കേസിലെ പ്രതി വെസ്റ്റ് ബംഗാൾ സ്വദേശി സീതാറാം (26 )നെയാണ് നടക്കാവ് പോലീസ് പിടികൂടിയത്.
12.08.2025 തീയ്യതി പുലർച്ചെ എരഞ്ഞിപ്പാലത്തുള്ള ഷാ ഹെൽത്ത് സ്റ്റുഡിയോയിലുള്ള ജിമ്മിലെ റിസപ്‌ഷനിൽ സൂക്ഷിച്ചിരുന്ന കോഴിക്കോട് ബീച്ച് സ്വദേശിയും ജിം ട്രയിനറുമായ മുഹമ്മദ് അഫ്താബിന്റെ മൊബൈൽ ഫോണും, സ്ഥാപനത്തിന്റെ ഉടമസ്ഥതയിലുള്ള മൊബൈൽ ഫോണും, ടാബ്ലറ്റം, സ്ഥാപനത്തിൽ ജിമ്മിന് വരുന്നവർ സൂക്ഷിച്ചുവെച്ച നാല് ജോഡി ഷൂസും പ്രതി മോഷണം നടത്തുകയായിരുന്നു. തുടർന്ന് യുവാവിന്റെ പരാതിയിൽ നടക്കാവ് പോലീസ് കേസ് രജിസ്റ്റർ ചെയ്ത് അന്വേഷണം നടത്തുകയും, ജിമ്മിലെ CCTV ദൃശ്യങ്ങൾ പരിശോധിച്ചതില്‍ നിന്നും പ്രതിയെ പറ്റി മനസ്സിലാക്കുകയും, പോലീസ് അന്വേഷണം നടത്തുന്നതിനിടയിൽ എരഞ്ഞിപ്പാലം വെച്ച് അന്വേഷണസംഘം പ്രതിയെ കസ്റ്റഡിയിലെടുക്കുകയായിരുന്നു. പ്രതി രണ്ട് മാസം മുൻപ് വെസ്റ്റ് ബംഗാളിൽ നിന്ന് കോഴിക്കോട് എത്തുകയും, വിവിധ ഹോട്ടലുകളിൽ ജോലിയെടുത്തും, ബസ്സ് സ്റ്റാന്റെ്, റെയിൽവെ സ്റ്റേഷൻ എന്നിവിടങ്ങളിൽ കിടന്നുറങ്ങാറുമാണ് പതിവെന്നും, ഇയാൾ മറ്റ് കുറ്റകൃത്യങ്ങളിൽ ഏർപ്പെട്ടിട്ടുണ്ടൊയെന്നും പരിശോധിച്ച് വരികയാണെന്ന് പോലീസ് പറഞ്ഞു. നടക്കാവ് പോസീസ് സ്റ്റേഷൻ സബ്ബ് ഇൻസ്പെക്ടർ ലീല, SCPO മാരായ അനിൽ ജോസ്, ധനീഷ്, പ്രസാദ്, എന്നിവരടങ്ങിയ അന്വേഷണസംഘമാണ് പ്രതിയെ കസ്റ്റഡിയിലെടുത്തത്. കോടതിയിൽ ഹാജരാക്കിയ പ്രതിയെ റിമാന്‍ഡ് ചെയ്തു .
