കോഴിക്കോട് : മെഡിക്കൽ കോളജ് ഇൻസ്പെക്ടർ പി.കെ. ജിജീഷിൻ്റെ നേതൃത്വത്തിൽ ചുരുളഴിച്ച ദൃശ്യം മോഡൽ ഹേമചന്ദ്രൻ കൊലകേസിൽ അഞ്ച് പേർ കൂടി പ്രതികളാവും. ഇതിൽ രണ്ട് പേർ ഗൾഫിലും , ഒരാൾ കണ്ണൂരിലും, രണ്ടു പേർ വയനാട് സ്വദേശികളുമാണ്. കൊലപാതകത്തിന് ശേഷം മൃതദേഹം- ദൃശ്യം – മോഡലിൽ ഒളിപ്പിക്കാനും തെളിവുകൾ നശിപ്പിക്കാനും കൂട്ടുനിന്ന ഇവരെ ഉടൻ അറസ്റ്റ് ചെയ്യും. ചേരമ്പാടി വനത്തിൽ നിന്ന് കുഴിച്ചെടുത്ത മൃതദേഹത്തിൻ്റെ ഡി എൻ എ പരിശോധന നടത്തുന്നതിന് ഹേമചന്ദ്രൻ്റെ അമ്മയുടെയും സഹോദരിയുടെയും രക്തസാമ്പിളുകൾ പോലീസ് ശേഖരിച്ചു. കർണാടകയിലെ കുടകിലുള്ള വീട്ടിലെത്തിയാണ് സാമ്പിളുകൾ ശേഖരിച്ചത്. ഇനി കോഴിക്കോട് മായനാട് താമസിക്കുന്ന ഭാര്യയുടെയും മകളുടെയും രക്തസാമ്പിൾ ശേഖരിക്കും. അതിനു ശേഷം , ഊട്ടിയിലെ മോർച്ചറിച്ചിൽ സൂക്ഷിച്ചിരിക്കുന്ന മൃതദ്ദേഹ സാമ്പിളും, രക്ത സാമ്പിളുകളും കണ്ണൂരിലേ ഫോറൻസിക് ലാബിലേക്ക് അയക്കും. റിസൾട്ട് വന്ന ശേഷമായിരിക്കും പോലിസ് കസ്റ്റഡിയിൽ സൂക്ഷിച്ചിട്ടുള്ള ഹേമചന്ദ്രൻ്റെ മൃതദ്ദേഹം ബന്ധുക്കൾക്ക് വിട്ടുകൊടുക്കുക. ഇതിനിടെ,ഒന്നാം പ്രതി വയനാട് ബത്തേരി സ്വദേശി നൗഷാദിനെ സൗദി അറേബ്യയിൽ നിന്ന് തിരിച്ചെത്തിക്കാൻ പോലീസ് നടപടി ആരംഭിച്ചു. സൗദിയിൽ ഡ്രൈവറായ നൗഷദിനെ തിരികെയെത്തിക്കാൻ പോലിസ് സൗദി ഭരണകൂടത്തിൻ്റെ സഹായം തേടി. ഇയാൾക്കായി ലുക്കൗട്ട് നോട്ടീസും പുറപ്പെടുവിക്കും. ബത്തേരിയിൽ റെൻ്റ് എ കാർ ബിസിനസ് നടത്തി വന്ന നൗഷാദ് ഡ്രൈവർ കൂടിയാണ്. ഇതിനു പുറമെ പണമിടപാടും നടത്തിയിരുന്നു. പണമിടപാടിൽ ഹേമചന്ദ്രനുമായുണ്ടായ തർക്കമാണ് കൊലപാതകത്തിൽ കലാശിച്ചത്. കേസിൽ നൗഷാദ് ഒന്നാം പ്രതിയാണ്.
