കോഴിക്കോട്: “മനുഷ്യസ്നേഹത്തിന്റെ പ്രതീകവും കരുണയുടെ ദീപ്തിയും” ആയി അറിയപ്പെടുന്ന കോട്ടൂളി സ്വദേശി എം. ശിവനെ, മാനസികാരോഗ്യ വാരാചരണത്തിന്റെ ഭാഗമായി ലയൺസ് ക്ലബ് ഓഫ് കാലിക്കറ്റ് സാമോറിയൻസ് ആദരിച്ചു.
1974-ൽ ആഭ്യന്തര മന്ത്രാലയത്തിന്റെ ഇന്റലിജൻസ് ബ്യൂറോയിലേക്ക് ചേർന്ന ശിവൻ, 36 വർഷത്തിന് ശേഷം വിരമിച്ചു. നാഗാലാൻഡ്, മണിപ്പൂർ, അസം, അരുണാചൽ പ്രദേശ്, മേഘാലയ, ഹിമാചൽ പ്രദേശ്, ഗുജറാത്ത്, അണ്ടമാൻ നിക്കോബാർ ദ്വീപുകൾ, ലക്ഷദ്വീപ് തുടങ്ങിയ അതിർത്തി സംസ്ഥാനങ്ങളിൽ നിർണായക ചുമതലകൾ നിർവഹിച്ച് 2010-ൽ വിരമിച്ചു. മികച്ച സേവനത്തിന് നിരവധി പ്രശംസാപത്രങ്ങളും അംഗീകാരങ്ങളും അദ്ദേഹത്തിന് ലഭിച്ചിട്ടുണ്ട്.
വിരമിച്ചതിന് ശേഷം സാമൂഹ്യസേവന രംഗത്തേക്ക് തിരിഞ്ഞ ശിവൻ, 2016-ൽ അന്നത്തെ കോഴിക്കോട് ജില്ലാ കലക്ടർ എൻ. പ്രശാന്തിന്റെ അഭ്യർത്ഥനപ്രകാരം, മാനസികാരോഗ്യ കേന്ദ്രങ്ങളിലെയും സാമൂഹ്യനീതി വകുപ്പിന്റെ വീടുകളിലെയും അനാഥരായ രോഗികളെ അവരുടെ കുടുംബങ്ങളുമായി വീണ്ടും ഒന്നിപ്പിക്കുന്ന മഹത്തായ ദൗത്യം ഏറ്റെടുത്തു.
ലയൺസ് ക്ലബ് ഓഫ് കാലിക്കറ്റ് സാമോറിയൻസ് ശിവന്റെ ഈ മഹത്തായ സേവനങ്ങളെ പ്രശംസിച്ച് ആദരിച്ചത് ചടങ്ങിന്റെ മുഖ്യ ആകർഷണമായി.
ഡിസ്റ്റ്രിക് ഗവർണർ രവി ഗുപ്ത ശിവന് മൊമെന്റോ നൽകി ആദരവ് അർപ്പിച്ചു. ക്ലബ് പ്രസിഡൻറ് സോമസുന്ദരൻ അധ്യക്ഷത വഹിച്ചു. സെക്രട്ടറി ബാബു ചിറമേൽ, വിജയകുമാർ, കെ. ടി. പി. ഉണ്ണികൃഷ്ണൻ, എം. എൽ. വർക്കി എന്നിവർ പ്രസംഗിച്ചു.
