തിരുവമ്പാടി : മനുഷ്യ-വന്യജീവി സംഘർഷത്തിന് ശാശ്വതമായ പരിഹാരമില്ല എന്ന വനംമന്ത്രി എ.കെ. ശശീന്ദ്രന്റെ നിരുത്തരവാദപരമായ പ്രസ്താവനക്കെതിരെ ശക്തമായ പ്രതിഷേധവുമായി കേരള ഇൻഡിപെൻഡന്റ് ഫാർമേഴ്‌സ് അസോസിയേഷൻ (KIFA) രംഗത്ത്.
കർഷകരുടെയും മലയോര ജനതയുടെയും ജീവനും സ്വത്തിനും യാതൊരു വിലയും കൽപ്പിക്കാത്ത മന്ത്രിയുടെ ഈ ‘കൈയ്യൊഴിയൽ’ പ്രസ്താവന അങ്ങേയറ്റം അപലപനീയമാണെന്ന് KIFA കോഴിക്കോട് ജില്ലാ കമ്മറ്റി.
മന്ത്രിയുടെ പ്രസ്താവനയോടെ, വന്യജീവി ആക്രമണത്തിൽ ഭീഷണി നേരിടുന്ന ആയിരക്കണക്കിന് കർഷകരെ സർക്കാർ പൂർണ്ണമായും കൈവിട്ടിരിക്കുന്നു എന്ന് വ്യക്തമായിരിക്കുകയാണ്. ‘ശാശ്വത പരിഹാരമില്ല’ എന്ന പ്രസ്താവന, കർഷകർക്ക് എതിരായ മരണവാറന്റ് നൽകുന്നതിന് തുല്യമാണ്. കൃഷി ഉപേക്ഷിച്ച്, വീടും സ്ഥലവും വിറ്റ് നാടുവിടാനാണ് സർക്കാർ നൽകുന്ന സന്ദേശമെങ്കിൽ അത് അംഗീകരിക്കാൻ കഴിയില്ലെന്ന് ജില്ലാ പ്രസിഡണ്ട് മനോജ് കുംബ്ലാനി പ്രസ്താവിച്ചു.
*KIFA യുടെ പ്രധാന ആവശ്യങ്ങൾ:*
1. മന്ത്രി പ്രസ്താവന പിൻവലിക്കണം: നിസ്സഹായതയുടെയും ഭരണപരാജയത്തിന്റെയും പ്രതീകമായ പ്രസ്താവന വനംമന്ത്രി ഉടൻ പിൻവലിച്ച്, പ്രശ്നത്തിന് പരിഹാരം കാണാൻ പ്രതിജ്ഞാബദ്ധമാണെന്ന് പ്രഖ്യാപിക്കണം.
2. ഫലപ്രദമായ നിയമനിർമ്മാണം: വന്യജീവി സംരക്ഷണ നിയമത്തിലെ മനുഷ്യന് ഭീഷണിയാകുന്ന വന്യജീവികളെ കൈകാര്യം ചെയ്യാനുള്ള 11-ാം വകുപ്പിൽ ആവശ്യമായ ഭേദഗതികൾ വരുത്താൻ കേന്ദ്രത്തിൽ സമ്മർദ്ദം ചെലുത്തുക
3. ദ്രുതകർമ്മ സേനയെ ശക്തിപ്പെടുത്തുക,വിസ്ത ക്ലിയറൻസ് നടപ്പാക്കുക,നാമമാത്രമായ ‘ലഘൂകരണ’ (Mitigation) ശ്രമങ്ങൾ അവസാനിപ്പിച്ച്, ജനവാസ കേന്ദ്രങ്ങളിലെത്തുന്ന വന്യജീവികളെ ഉടൻ തുരത്താനും പിടികൂടാനും കഴിവുള്ള അത്യാധുനിക സജ്ജീകരണങ്ങളോടുകൂടിയ സേനയെ എല്ലാ ഹോട്ട്‌സ്‌പോട്ടുകളിലും വിന്യസിക്കുക.
4. നഷ്ടപരിഹാരം കാലാനുസൃതമാക്കുക: വന്യജീവി ആക്രമണത്തിൽ ജീവഹാനി സംഭവിക്കുന്നവർക്ക് 50 ലക്ഷം രൂപയും, വിളനാശത്തിന് മാർക്കറ്റ് വിലയുടെ 100% ഉം ഉടനടി നൽകാൻ നടപടി സ്വീകരിക്കുക.
കർഷകരുടെ ആശങ്കകൾ അവഗണിക്കപ്പെട്ടാൽ, വരും ദിവസങ്ങളിൽ KIFA യുടെ നേതൃത്വത്തിൽ ശക്തമായ പ്രതിഷേധ പരിപാടികൾ സംഘടിപ്പിക്കും എന്ന് കിഫ ചെയർമാൻ Adv. അലക്സ് ഒഴുകയിൽ അറിയിച്ചു.
വന്യജീവികളിൽ നിന്ന് സ്വന്തം ജനതയുടെ ജീവൻ സംരക്ഷിക്കാൻ കഴിയാത്ത ഒരു ഭരണകൂടം എന്തിനാണ് ഭരിക്കുന്നതെന്ന് മന്ത്രി വ്യക്തമാക്കണം.
കർഷകരുടെ ജീവൻ പന്താടാൻ കിഫ അനുവദിക്കില്ല.
പ്രതിഷേധയോഗത്തിൽ മനോജ് കുംബ്ലാനി അധ്യക്ഷത വഹിച്ചു. ജിജി വെള്ളാവൂർ,ബോണി ജേക്കബ്,ബെന്നി ജോൺ,ജിനീഷ് പുതുക്കുളങ്ങര, രാജേഷ് ജെയിംസ്,ബോബി ജോസഫ്, അനീഷ് മംഗലത്ത് തുടങ്ങിയവർ സംസാരിച്ചു.
