കോഴിക്കോട്: മര്‍കസു സഖാഫത്തി സുന്നിയ്യക്ക് കീഴില്‍ സംഘടിപ്പിക്കുന്ന പതിനേഴാമത് അന്താരാഷ്ട്ര മീലാദ് സമ്മേളനം വെളളിയാഴ്ച നടക്കും. ഉച്ചക്ക് 2 മണി മുതല്‍ രാത്രി 9.30 വരെ ഓണ്‍ലൈനിലാണ് സംഗമം. മലേഷ്യന്‍ മതകാര്യ മന്ത്രി ഡോ. സുല്‍കിഫ്ലി മുഹമ്മദ് അല്‍ ബകരിയാണ് മീലാദ് സംഗമം ഉദ്ഘാടനം ചെയ്യുക. ഇന്ത്യന്‍ ഗ്രാന്‍ഡ് മുഫ്തി കാന്തപുരം എ.പി അബൂബക്കര്‍ മുസ്ലിയാരുടെ വാര്‍ഷിക മദ്ഹു റസൂല്‍ പ്രഭാഷണവും ഇതോടൊപ്പമുണ്ടാകും. മുപ്പതോളം രാഷ്ട്രങ്ങളില്‍ നിന്നുള്ള മുസ്ലിം പണ്ഡിതര്‍ പങ്കെടുക്കുന്ന സംഗമത്തിലെ പ്രവാചക സന്ദേശ പ്രഭാഷണങ്ങളും അന്താരാഷ്ട്ര സംഘങ്ങള്‍ അവതരിപ്പിക്കുന്ന നബികീര്‍ത്തനങ്ങളും പരിപാടിക്ക് മാറ്റേകും.
ഈജിപ്ത് ഗ്രാന്‍ഡ് മുഫ്തി ഡോ. ശൗഖി അല്ലാം മുഖ്യപ്രഭാഷണം നടത്തും. ലോക പ്രശസ്ത മദ്ഹ് ഗസല്‍ അവതാരകന്‍ ഉവൈസ് റസാ ഖാദിരി പ്രകീര്‍ത്തനം അവതരിപ്പിക്കും. ശൈഖ് മുഹമ്മദ് അവ്വ സിറിയ, ചെച്നിയന്‍ ഗ്രാന്‍ഡ് മുഫ്തി ശൈഖ് സലാഹ് മസീവ് , ശൈഖ് ഉസാമ രിഫാഈ ലബനാന്‍, , ഡോ ഹിശാം ഖരീസ ടുണീഷ്യ, ശൈഖ് ഉസാമ മുന്‍സി അല്‍ ഹസനി മക്ക, ശൈഖ് മുഹമ്മദ് അല്‍ യാഖൂബി മൊറോക്കോ, ശൈഖ് മുഹമ്മദ് റാത്വിബ് നബ്ലൂസി തുര്‍ക്കി, ശൈഖ് അബ്ദുറഹ്മാന്‍ റഹൂഫ് യമാനി ചൈന, ഷൈഖ് ഔന്‍ ഖദ്ദൂമി ജോര്‍ദാന്‍, ശൈഖ് ഫൈസല്‍ അബ്ദു റസാഖ് കാനഡ, ശൈഖ് അബു ഇസ്ലാം സ്വീഡന്‍, ശൈഖ് മുഹമ്മദ് അബ്ദുല്ല ബ്രസീല്, ശൈഖ് അബ്ദുല്‍ വാഹിദ് ഡെന്മാര്‍ക്ക്, ശൈഖ് മുഹമ്മദ് ബിസ്താരി അല്‍ബേനിയ, ശൈഖ് മഹമൂദ് അബ്ദുല്‍ ബാരി സോമാലിയ എന്നീ പണ്ഡിതര്‍ സമ്മേളനത്തില്‍ പ്രഭാഷണങ്ങള്‍ നടത്തും. മര്‍കസ് പ്രസിഡന്റ് സയ്യിദ് അലി ബാഫഖി തങ്ങള്‍ പ്രാര്‍ത്ഥന നടത്തും. സമസ്ത പ്രസിഡന്റ് ഇ. സുലൈമാന്‍ മുസ്ലിയാര്‍ അധ്യക്ഷത വഹിക്കും. സയ്യിദ് സൈനുല്‍ ആബിദീന്‍ ബാഫഖി മലേഷ്യ, സി മുഹമ്മദ് ഫൈസി, പേരോട് അബ്ദുറഹ്മാന്‍ സഖാഫി, ഡോ. അബ്ദുല്‍ ഹകീം അസ്ഹരി സംബന്ധിക്കും. മര്‍കസിന്റെ ഔദ്യോഗിക യൂട്യൂബ് പേജായ www.youtube.com/markazonline ല്‍ സമ്മേളനം ലൈവായി സംപ്രേക്ഷണം ചെയ്യും.
2004 മുതല്‍ മര്‍കസിന്റെ കീഴില്‍ സംഘടിപ്പിക്കുന്ന അന്താരാഷ്ട്ര മീലാദ് സമ്മേളനം കൊവിഡ് പശ്ചാത്തലത്തിലാണ് ഓണ്‍ലൈനായി നടത്തുന്നത്. പ്രവാചകര്‍ മുഹമ്മദ് നബിയുടെ സന്ദേശങ്ങളെ തെറ്റായി പ്രചരിപ്പിക്കാനുള്ള ശ്രമങ്ങള്‍ വര്‍ദ്ധിക്കുന്ന ഈ കാലത്ത്, ശരിയായ ചരിത്ര വസ്തുതകളുടെ ബലത്തില്‍ നബിയുടെ ജീവിതത്തെ അവതരിപ്പിക്കുകയും, ലോകത്ത് പ്രചരിപ്പിക്കുകയും വിധത്തിലാണ് ഈ വര്‍ഷത്തെ പരിപാടികള്‍ ക്രമീകരിച്ചിരിക്കുന്നതെന്ന് സുന്നി വിദ്യാഭ്യാസ ബോര്‍ഡ് സെക്രട്ടറി പ്രൊഫ എ കെ അബ്ദുല്‍ ഹമീദ്, മര്‍കസ് പബ്ലിക് റിലേഷന്‍സ് വിഭാഗം മാനേജര്‍ സി പി ഉബൈദുല്ല സഖാഫി, മര്‍കസ് മീഡിയ കോഓര്‍ഡിനേറ്റര്‍ എം ലുഖ്മാന്‍ സഖാഫി എന്നിവര്‍ വാര്‍ത്താസമ്മേളനത്തില്‍ അറിയിച്ചു.
