ഐ സി സി ടെസ്റ്റ് ബാറ്റിംഗ് റാങ്കിംഗില്‍ ഇന്ത്യന്‍ നായകന്‍ വിരാട് കോലി ഒരു പടി താഴേക്ക് വീണപ്പോള്‍ ഇംഗ്ലണ്ട് നായകന്‍ ജോ റൂട്ട് മൂന്നാം സ്ഥാനത്തേക്ക് കയറി. ചെപ്പോക്ക് ടെസ്റ്റില്‍ ഇരട്ടസെഞ്ചുറി നേടി ടീമിന് ജയമൊരുക്കിയതാണ് റൂട്ടിന് റാങ്കിംഗില്‍ ഉയര്‍ച്ചയുണ്ടാക്കിയത്. ഇന്ത്യന്‍ നായകന്‍ വിരാട് കോലി നാലാം സ്ഥാനത്ത് നിന്ന് അഞ്ചാം സ്ഥാനത്തേക്ക് താഴ്ന്നു. ന്യൂസിലാന്‍ഡ് നായകന്‍ കെയിന്‍ വില്യംസണാണ് പട്ടികയില്‍ ഒന്നാം സ്ഥാനത്ത്. ഓസ്‌ട്രേലിയന്‍ താരം സ്റ്റീവ് സ്മിത്ത് രണ്ടാം സ്ഥാനത്ത്. ഓസീസിന്റെ മാര്‍നസ് ലബുഷാനെയാണ് നാലാം റാങ്കില്‍.
ഏഴാം സ്ഥാനത്തായിരുന്ന പാക്കിസ്ഥാന്റെ ബാബര്‍ അസം ആറിലേക്ക് കയറിയപ്പോള്‍ ആറാമതായിരുന്ന ചേതേശ്വര്‍ പുജാര ഏഴാം സ്ഥാനത്തേക്കിറങ്ങി.
ഓസ്‌ട്രേലിയയില്‍ ഇന്ത്യയുടെ ടോപ് സ്‌കോററായ റിഷഭ് പന്ത് 600 റേറ്റിംഗ് പോയിന്റുകളാണ് വര്‍ധിപ്പിച്ചത്. ടെസ്റ്റ് റാങ്കിംഗില്‍ പതിമൂന്നാം സ്ഥാനത്തേക്ക് കയറാനും റിഷഭിന് സാധിച്ചു. ശുഭ്മാന്‍ ഗില്ലും റാങ്കിംഗില്‍ നേട്ടമുണ്ടാക്കി. ഏഴ് സ്ഥാനം കയറിയ ശുഭ്മാന്‍ ഗില്‍ നാല്‍പതാം സ്ഥാനത്താണിപ്പോള്‍.
ബൗളിംഗ് റാങ്കിംഗില്‍ രവിചന്ദ്രന്‍ അശ്വിനും ജസ്പ്രീത് ബുമ്‌റയും മുകളിലേക്ക് കയറി.
ബുമ്‌റ എട്ടാം സ്ഥാനത്തും അശ്വിന്‍ ഏഴാം സ്ഥാനത്തുമാണ്. ചെപ്പോക്കില്‍ തിളങ്ങിയ ഇംഗ്ലണ്ടിന്റെ ജെയിംസ് ആന്‍ഡേഴ്‌സന്‍ മൂന്നാം സ്ഥാനത്തേക്ക് കയറി.
