മലപ്പുറം: സമയം കഴിഞ്ഞും ബിവറേജില്‍ നിന്നും മദ്യം വാങ്ങി പോലീസുകാര്‍. മലപ്പുറത്താണ് സംഭവം. പൊലീസുദ്യോഗസ്ഥര്‍ മദ്യം വാങ്ങുന്നതിന്റെ ദൃശ്യങ്ങള്‍ നാട്ടുകാര്‍ ഫോമില്‍ പകര്‍ത്തിയതോടെ ഇരു കൂട്ടരും തമ്മില്‍ വാക്കേറ്റവും കയ്യാങ്കളിയുമുണ്ടായി. ദൃശ്യങ്ങള്‍ പകര്‍ത്തിയത് ചോദ്യം ചെയ്ത് പോലീസ് നാട്ടുകാരെ മര്‍ദ്ദിച്ചുവെന്നും ആരോപണമുണ്ട്. സംഭവത്തില്‍ പരിക്കേറ്റ കണ്ടനകം സ്വദേശി സുനീഷ് കുമാര്‍ എടപ്പാളിലെ സ്വകാര്യ ആശുപത്രിയില്‍ ചികിത്സയിലാണ്.
മലപ്പുറം എടപ്പാള്‍ കണ്ടനകം ബിവറേജില്‍ ഇന്നലെ രാത്രി 9.30യോടെയായിരുന്നു സംഭവം. ചങ്ങരംകുളം സ്റ്റേഷനിലെ ഉദ്യോഗസ്ഥരാണ് എന്ന് പറഞ്ഞാണ് സംഘം നാട്ടുകാരെ മര്‍ദ്ദിച്ചത്.
മദ്യവില്‍പനയ്ക്കായുള്ള സമയം കഴിഞ്ഞ് രണ്ട് പേര്‍ ബിവറേജിന്റെ ഗേറ്റിന് പുറത്തുനിന്ന് ജീവനക്കാരോട് സംസാരിക്കുന്നതും പണം കൈമാറുന്നതും കണ്ട സുനീഷ് ഇത് ഫോണില്‍ പകര്‍ത്തുകയായിരുന്നു. ഇത് കണ്ടതോടെ പോലീസുദ്യോഗസ്ഥര്‍ സുനീഷിനരികിലെത്തുകയും മര്‍ദ്ദിക്കുകയുമായിരുന്നുവെന്നാണ് പരാതി.
