കോഴിക്കോട്: ബിജെപി പ്രവര്‍ത്തകയെ സിപിഎമ്മുകാര്‍ ക്രൂരമായി മര്‍ദ്ദിച്ചതായി പരാതി. ബേപ്പൂര്‍ ഗോതീശ്വരം കിഴക്കേടത്ത് റിജേഷിന്റെ ‘ഭാര്യ ദീപ്തിയ്ക്കുനേരെയാണ് ആക്രമണം ഉണ്ടായത്. ജോലി കഴിഞ്ഞ് മടങ്ങി വരുമ്പോള്‍ ബിസി റോഡില്‍വെച്ചാണ് ദീപ്തിക്ക് നേരെ അക്രമമുണ്ടായത്. ഹെല്‍മറ്റ് ധരിച്ച് ബൈക്കിലെത്തിയ രണ്ടു പേര്‍ മര്‍ദ്ദിക്കുകയായിരുന്നു. അവശയായ ദീപ്തിയെ ആശുപത്രിയില്‍ പ്രവേശിപ്പിച്ചു. കഴിഞ്ഞ ദിവസം സിപിഎം ആഹ്ലാദപ്രകടനം ഇവരുടെ വീടിന് മുന്നിലൂടെ കടന്നു പോകുന്നതിനിടെ ദീപ്തിക്ക് നേരെ ഭീഷണിമുഴക്കിയിരുന്നുവെന്നും
അക്രമികള്‍ക്കെതിരെ പോലീസ് കര്‍ശന നടപടി സ്വീകരിക്കണമെന്നും ബിജെപി ജില്ലാ പ്രസിഡന്റ് അഡ്വ. വി.കെ. സജീവന്‍ ആവശ്യപ്പെട്ടു. തെരഞ്ഞെടുപ്പ് വിജയത്തിന്റെ മറവില്‍ ബിജെപി പ്രവര്‍ത്തകര്‍ക്കും സ്ഥാപനങ്ങള്‍ക്കും വീടുകള്‍ക്കും നേരെയുള്ള അക്രമങ്ങള്‍ അവസാനിപ്പിക്കാന്‍ സിപിഎം തയ്യാറാകണം. സ്ത്രീകള്‍ക്ക് നേരെയുള്ള അക്രമത്തെ കയ്യുംകെട്ടി നോക്കിയിരിക്കാനാകില്ലെന്നും സജീവന്‍ പ്രസ്താവനയില്‍ പറഞ്ഞു.
ബിജെപി സംസ്ഥാന സെക്രട്ടറി അഡ്വ. കെ.പി. പ്രകാശ്ബാബു, മേഖലാ ജനറല്‍ സെക്രട്ടറി പി. ജിജേന്ദ്രന്‍, ജില്ലാ പ്രസിഡന്റ് അഡ്വ. വി.കെ. സജീവന്‍, മണ്ഡലം പ്രസിഡന്റ് ഷിനു പിണ്ണാണത്ത് എന്നിവര്‍ ദീപ്തിയെ സന്ദര്‍ശിച്ചു.
