കാസര്ക്കോട്:സ്കൂള് വിദ്യാര്ത്ഥികള്ക്കായുള്ള ഫ്രീഡം ക്വിസില് വി ഡി സവര്ക്കറെ പുകഴ്ത്തുന്ന ചോദ്യാവലി വിവാദമായി. മഞ്ചേശ്വരം, കുമ്പള, കാസര്കോട് ഉപജില്ലകളിലെ സ്കൂളുകളിലേക്ക് വിദ്യാഭ്യാസ വകുപ്പ് നല്കിയ ചോദ്യാവലിയാണ് വിവാദത്തിലായിരിക്കുന്നത്. ബ്രിട്ടീഷുകാരുടെ കയ്യില് നിന്ന് ഏറ്റവും കൂടുതല് ശിക്ഷ ലഭിച്ച സ്വാതന്ത്ര്യ സമര സേനാനി എന്ന ചോദ്യത്തിന് ഉത്തരം ആയാണ് വി ഡി സവര്ക്കര് എന്ന് നല്കിയിരിക്കുന്നത്.എല്പി വിദ്യാര്ത്ഥികള്ക്കായുള്ള ഫ്രീഡം ക്വിസിന്റെ ചോദ്യാവലിയിലാണ് ചരിത്ര വിരുദ്ധമായ ചോദ്യം ഉള്പ്പെട്ടത്. മൂന്ന് ഉപജില്ലകളിലെയും സോഷ്യല് സയന്സ് ക്ലബ് അസോസിയേഷന് ചുമതലയുള്ള അധ്യാപകര് ചേര്ന്നാണ് ചോദ്യാവലി തയ്യാറാക്കിയത്. ടൈബ്രേക്കര് ചോദ്യമായാണ് ഇത് ഉള്പ്പെടുത്തിയിരിക്കുന്നത്. ചോദ്യാവലി തയ്യാറാക്കുന്നതിന് പ്രത്യേകം ചുമതലയുള്ള ഉദ്യോഗസ്ഥര് ഉപജില്ലകളില് ഉണ്ടായിരുന്നു. ഉദ്യോഗസ്ഥരുടെ അറിവോടെ തന്നെയാണ് ചോദ്യം ഉള്പ്പെട്ടതെന്നാണ് കരുതുന്നത്. സംഭവം വിവാദമായതോടെ അന്വോഷണം നടത്തുമെന്നും ആവിശ്യമായ നടപടി സ്വീകരിക്കുമെന്നും് ജില്ലാ വിദ്യാഭ്യാസ ഉപഡയറക്ടര് അറിയിച്ചു.
