ബോളിവുഡ് സംവിധായകനും നടനുമായ അനുരാഗ് കശ്യപിന് ജന്മദിനാശംസകളുമായി ആഷിഖ് അബുവിന്റെ റൈഫിള്‍ ക്ലബ്ബ് ടീം. ചിത്രത്തില്‍ ദയാനന്ദ് ബാരെ എന്ന കഥാപാത്രത്തെയാണ് ആഷിഖ് അബു അവതരിപ്പിക്കുന്നത്. അനുരാഗിന്റെ ജന്മദിനത്തില്‍ റൈഫിള്‍ ക്ലബിന്റെ ക്യാരക്ടര്‍ പോസ്റ്ററും അണിയറ പ്രവര്‍ത്തകര്‍ പുറത്തുവിട്ടിരുന്നു.
മലയാള സിനിമയില്‍ അഭിനേതാവായി അനുരാഗ് കശ്യപിന്റെ അരങ്ങേറ്റം കൂടിയാണ് റൈഫിള്‍ ക്ലബ്. ഒപിഎം സിനിമാസിന്റെ ബാനറില്‍ ആഷിഖ് അബു, വിന്‍സന്റ് വടക്കന്‍, വിശാല്‍ വിന്‍സന്റ് ടോണി എന്നിവര്‍ നിര്‍മ്മിക്കുന്ന ചിത്രം റിലീസിന് ഒരുങ്ങുകയാണ്.
ആഷിഖ് അബുവിനോട് ചോദിച്ചു വാങ്ങിയ വേഷത്തിലൂടെയാണ് അനുരാഗ് മലയാളത്തിലെത്തുന്നത്. ചിത്രത്തിന്റെ കാസ്റ്റിങ്ങ് കോള്‍ പോസ്റ്ററിന് താഴെ, ‘അതിഥി വേഷത്തിനു നിങ്ങള്‍ക്ക് മുംബൈയില്‍ നിന്ന് ഒരു ഉത്തരേന്ത്യന്‍ നടനെ ആവശ്യമുണ്ടോ?’ എന്ന് അനുരാഗ് കശ്യപ് കമന്റ് ചെയ്തിരുന്നു. ഇതിന് ”അതെ സര്‍ജി, സ്വാഗതം” എന്നായിരുന്നു ആഷിഖ് അബു നല്‍കിയ മറുപടി.
ഇതിനു പിന്നാലെയാണ് ചിത്രത്തിലെ വില്ലന്‍ റോളിലേക്ക് അനുരാഗ് കശ്യപിനെ ആഷിഖ് അബു കാസ്റ്റ് ചെയ്തത്. ദിലീഷ് നായര്‍, ശ്യാം പുഷ്‌കരന്‍, ഷറഫു, സുഹാസ് എന്നിവര്‍ ചേര്‍ന്നാണ് റെഫിള്‍ ക്ലബ്ബിന്റെ തിരക്കഥയും സംഭാഷണവും ഒരുക്കിയിരിക്കുന്നത്. ‘മായാനദി’ക്ക് ശേഷം ആഷിക്ക് അബു, ശ്യാം പുഷ്‌കരന്‍, ദിലീഷ് നായര്‍ ടീം ഒന്നിക്കുന്നു എന്ന പ്രത്യേകതയും ഈ ചിത്രത്തിനുണ്ട്. ആഷിഖ് അബു തന്നെയാണ് ചിത്രത്തിന്റെ ഛായാഗ്രഹണവും നിര്‍വഹിച്ചിരിക്കുന്നത്.
