കോഴിക്കോട് : കോഴിക്കോട് റോട്ടറി സൺറൈസ് ക്ലബ്ബിന്റെ 2024 – 25 വർഷത്തേക്കുള്ള ഭാരവാഹികളായി ഇബ്രാഹിം പി. (പ്രസിഡന്റ്), റോഷൻ ജോൺ (സെക്രട്ടറി), ഇസ്ഹാഖ് സി. ടി. (ട്രഷറർ) എന്നിവർ സ്ഥാനമേറ്റു. കോഴിക്കോട് മാനുവൽസൺസ് മലബാർ പാലസിൽ വെച്ച് നടന്ന ‘സുധർമ്മം’ എന്ന് പേരിട്ട ചടങ്ങിൽ റോട്ടറി ക്ലബ്ബിന്റെ വിവിധ മേഖലകളിൽ നിന്നുളള മുഖ്യഭാരവാഹികളും പ്രതിനിധികളും പങ്കെടുത്തു.
സാമൂഹിക പ്രതിബദ്ധതയോടെ യുവത്വത്തെ ഏകോപിപ്പിച്ച് അറിവും അവസരങ്ങളും യഥാവിധി ഉപകാരപ്പെടുത്തി വ്യക്തിപരവും ബിസിനസ്സ്‌പരവുമായ വ്യത്യസ്ത പ്രോജക്റ്റുകൾ പ്ലാൻ ചെയ്ത് നടപ്പിലാക്കുന്നതിന് മുൻഗണന നൽകി പ്രവർത്തിക്കുമെന്ന് പ്രസിഡന്റ് ഇബ്രാഹിം പി. അറിയിച്ചു. മറ്റുള്ളവർക്ക് പ്രചോദനമാവും വിധം പ്രവർത്തിക്കുകയും റോട്ടറി ക്ലബ്ബിന്റെ പ്രവർത്തന മണ്ഡലത്തിനുള്ളിൽ നിന്നുകൊണ്ട് പരമാവധി പൊതുസേവനങ്ങൾ നടത്തുകയും ചെയ്യുന്നതിലൂടെ കൂടുതൽ പേരെ ക്ലബ്ബിലേക്ക് ആകർഷിക്കാനും അതുവഴി പൊതുജനോപകാരപ്രദമായ കൂടുതൽ പദ്ധതികൾ പ്രാവർത്തികമാക്കാനും കഴിയുമെന്ന് പ്രത്യാശിക്കുന്നതായി ഭാരവാഹികൾ കൂട്ടിച്ചേർത്തു. നാൽപതോളം വരുന്ന പ്രവർത്തക സമിതിയും ഇതോടൊപ്പം ഭാരവാഹിത്വം ഏറ്റെടുത്തു.
