കൊച്ചി: ഡല്ഹിയില് നടന്നുകൊണ്ടിരിക്കുന്ന കോക്രോച്ച് ജനതാ പാര്ട്ടിയുടെ സമരത്തിന് പിന്തുണയുമായി നടന് ഷൈന് ടോം ചാക്കോ. ഭരണത്തില് എതിര്പ്പുളളവരാണ് എതിര് ശബ്ദമുയര്ത്തുന്നതെന്ന് ഷൈന് ടോം ചാക്കോ പറഞ്ഞു. അവരെ അടിച്ചമര്ത്തുന്നത് ജനാധിപത്യമല്ലെന്നും രാജ്യദ്രോഹികളാകുന്നത് ഭരണകൂടത്തിനെതിരെ സംസാരിക്കുമ്പോഴാണെന്നും ഷൈന് ടോം ചാക്കോ കൂട്ടിച്ചേര്ത്തു. സര്ക്കാരിനെക്കൊണ്ട് പറ്റാത്ത കാര്യങ്ങളാകാം സ്വകാര്യ കമ്പനിയെ ഏല്പ്പിക്കുന്നത് എന്നാണ് നീറ്റ് പരീക്ഷയെക്കുറിച്ച് ഷൈന് പറഞ്ഞത്. ഡല്ഹി എന്നല്ല ലോകത്ത് എവിടെയാണെങ്കിലും അവകാശങ്ങള്ക്ക് വേണ്ടി സംസാരിക്കുന്നവര്ക്കൊപ്പമാണ് താന് എന്നും ഷൈന് ടോം ചാക്കോ പറഞ്ഞു. താരങ്ങള് പറയുന്നത് അവരുടെ അഭിപ്രായമാണെന്നും അത് പറയാനുളള സ്വാതന്ത്ര്യമാണ് 1947-ല് ലഭിച്ചതെന്നും അദ്ദേഹം കൂട്ടിച്ചേര്ത്തു.
ഷൈന് ടോം ചാക്കോ പ്പോലെ നിരവധി സിനിമാ താരങ്ങളാണ് കേന്ദ്ര സര്ക്കാരിനെതിരെ വിമര്ശിച്ച് ഡല്ഹിയില് നടക്കുന്ന സിജെപിയുടെ പ്രതിഷേധത്തിന് പിന്തുണ പ്രഖ്യാപിച്ച് രംഗത്ത് വരുന്നത്. മമ്മൂട്ടി, മഞ്ജു വാര്യര്, പാര്വതി തിരുവോത്ത്, കുഞ്ചാക്കോ ബോബന്, ടൊവിനോ തോമസ്, ആഷിഖ് അബു, ജോജു ജോസഫ്, ഭാവന, ദിവ്യ പ്രഭ, ആസിഫ് അലി, കിഷോര് തുടങ്ങിയവരാണ് വിദ്യാര്ത്ഥികള്ക്ക് ഐക്യദാര്ഢ്യവുമായി രംഗത്തെത്തിയത്.
