മുക്കം: 2019 ആഗസ്റ്റ് മാസം മുക്കത്തെ സ്വകാര്യ ലോഡ്ജിലെ താമസക്കാരന്റെ സ്കൂട്ടർ മോഷണം നടത്തിയ കേസിലെ പ്രതി മുക്കം പോലീസിൻ്റെ പിടിയിൽ. തിരുവനന്തപുരം പാങ്ങോട് സ്വദേശി കളിയിലരികത്തു വീട്ടിൽ നസിറുദ്ധീൻ ആണ് (50) മുക്കം പോലീസിന്റെ പ്രത്യേക അന്വേഷണ സംഘത്തിന്റെ പിടിയിലായത്. പ്രതികളെ പിടികൂടാനുള്ള പഴയ കേസുകൾ അന്വേഷിക്കുന്നതിനായി മുക്കം പോലീസ് രൂപീകരിച്ച പ്രത്യേക അന്വേഷണ സംഘമാണ് രഹസ്യ വിവരത്തിന്റെ അടിസ്ഥാനത്തിൽ കൂടരഞ്ഞി പെട്രോൾ പമ്പിനു സമീപത്തുവെച്ചു വെള്ളിയാഴ്ച രാത്രിയിൽ പ്രതിയെ പിടികൂടിയത്. കോഴിക്കോട് കൂമ്പാറയിൽ നിന്നും വിവാഹം കഴിച്ച നസിറുദ്ധീനെ കൂമ്പാറയിലുള്ള ഭാര്യ വീട്ടിലേക്കു പോകുന്ന വഴിയാണ് പോലീസ് പിടികൂടിയത്. ഇയാളെ ചോദ്യം ചെയ്തതിൽ നിന്നും തിരുവനന്തപുരം സ്വദേശിയായ ഇയാൾ കഴിഞ്ഞ കുറെ വർഷങ്ങളായി കോഴിക്കോട് ജില്ലയിലെ കൂടരഞ്ഞി, മൂലാട്, മലപ്പുറം ജില്ലയിലെ തിരൂർ, കുറ്റിപ്പുറം എന്നിവിടങ്ങളിൽ ഹോട്ടലുകളിൽ ജോലി ചെയ്തു വരികയായിരുന്നു എന്നും മനസിലായി . മുക്കത്തു നിന്നും മോഷ്ടിച്ച ഹീറോ മാസ്‌ട്രോ സ്കൂട്ടർ കൊടുവള്ളിയിലെ ബൈക്ക് ലാൻഡ് എന്ന കടയിൽ നിന്നും അന്വേഷണ സംഘം കണ്ടെത്തി.
