കോഴിക്കോട് : വിജിൽ തിരോധാന കേസിൽ അന്വേഷണ ഉദ്യോഗസ്ഥർക്ക് ഡി.ജി.പിയുടെ ബഹുമതി.
കോഴിക്കോട് എലത്തൂർ സ്വദേശിയായ വിജിൽ തിരോധാന കേസിൽ അന്വേഷണ സംഘത്തിലുണ്ടായിരുന്ന സിറ്റി പോലീസ് കമ്മീഷണർ ടി. നാരായണൻ ഐ.പി.എസ്. ഡെപ്യൂട്ടി പോലീസ് കമ്മീഷണർ അരുൺ കെ പവിത്രൻ, അസി. പോലീസ് കമ്മീഷണർ അഷ്റഫ് ടി.കെ, എലത്തൂർ ഇൻസ്പെക്ടർ രഞ്ജിത്ത് ഉൾപ്പെടെയുള്ള അന്വേഷണ ഉദ്യോഗസ്ഥർക്കാണ് സംസ്ഥാന പോലീസ് മേധാവിയിൽ നിന്നും സത് സേവന പുരസ്കാര ബഹുമതി ലഭിച്ചത്.
2019 ൽ കൂട്ടുകാരോടൊപ്പം പോയ വിജിലിനെ കാണാതാവുകയും തുടർന്ന് വിജിലിന്റെ ബന്ധുക്കൾ നൽകിയ പരാതിയിലാണ് ആറുവർഷത്തിന് ശേഷം എരഞ്ഞിപ്പാലം സരോവരത്തുള്ള ചതുപ്പിൽവച്ച് വിജിലിന്റെ വസ്തുവും ഷൂസും അസ്ഥികളും കണ്ടെത്തിയത്. അതേ സമയം വയനാട് സ്വദേശി ഹേമചന്ദ്രൻ കൊല്ലപ്പെട്ട കേസിൽ അതിവിദഗ്ദമായി തെളിവുകൾ കണ്ടെത്തി പ്രതികളെ ഇരുമ്പഴിക്കുള്ളിലാക്കിയ മുൻ മെഡിക്കൽ കോളജ് ഇൻസ്പെക്ടർ പി.കെ. ജിജീഷിന് ഒരു അനുമോദനവും നൽകാതെ അദ്ദേഹത്തെ അകാരണമായി കാസർഗോഡ് ജില്ലയിലേക്ക് നാടുകടത്തിയ നടപടി പോലീസിൽ വീണ്ടും ചർച്ചയായി. സഹകരണ ബാങ്ക് ഭരണം പിടിച്ചടക്കാൻ ഭരണകക്ഷി നടത്തിയ വഴിവിട്ട നീക്കത്തെ എതിർത്തതിനെ തുടർന്ന് ജിജേഷ് സി പി എമ്മിന് അനഭിമിതനാവുകയും ഹേമചന്ദ്രൻ കേസിൽ കുറ്റപത്രം സമർപ്പിക്കുന്നതിന് മുൻപേ കാസർഗോഡ് കുമ്പളയിലേക്ക് നാടുകടത്തുകയുമായിരുന്നു. വിജിൽ കേസിൽ ഇപ്പോൾ അനുമോദനം ഏറ്റുവാങ്ങുന്ന സിറ്റി പോലീസ് കമീഷണർ ടി. നാരായണൻ, ഡെപ്യൂട്ടി കമീഷണർ അരുൺ കെ പവിത്രൻ എന്നിവർ അന്ന് കോഴിക്കോട് തന്നെ ഉണ്ടായിട്ടും ജിജേഷിൻ്റെ സ്ഥലം മാറ്റം തടയാനോ, ഡിജിപിയുടെ അവാർഡിന് ശിപാർശ ചെയ്യാനോ ചെറുവിരലനക്കിയില്ല. രാഷ്ട്രീയക്കാരുടെ നല്ലപിള്ളയായി തുടരുന്ന ഇവരുടെ ഇരട്ടത്താപ്പ് സേനയിൽ ചർച്ചയായിട്ടുണ്ട്.
