തിരുവനന്തപുരം: കേരളത്തിലെ ത്രിതല പഞ്ചായത്ത്, മുനിസിപ്പാലിറ്റി, കോർപ്പറേഷൻ തിരഞ്ഞെടുപ്പുകളിൽ ഡ്യൂട്ടിയിലുള്ള ജീവനക്കാർക്കുള്ള പോസ്റ്റൽ ബാലറ്റ് വിതരണം നവംബർ 26 മുതൽ ആരംഭിക്കുമെന്ന് സംസ്ഥാന തിരഞ്ഞെടുപ്പ് കമ്മീഷൻ അറിയിച്ചു. തിരഞ്ഞെടുപ്പ് ഡ്യൂട്ടി മൂലം സ്വന്തം ബൂത്തിൽ വോട്ട് ചെയ്യാൻ കഴിയാത്ത എല്ലാ സർക്കാർ-അർദ്ധസർക്കാർ ജീവനക്കാർക്കും പോലീസ് ഉദ്യോഗസ്ഥർക്കും ഈ സൗകര്യം ലഭിക്കും. തിരഞ്ഞെടുപ്പ് ഡ്യൂട്ടിക്ക് നിയോഗിക്കപ്പെട്ട എല്ലാ ജീവനക്കാർക്കും യഥാസമയം ഔദ്യോഗിക ഉത്തരവ് പുറപ്പെടുവിക്കാൻ ജില്ലാ തിരഞ്ഞെടുപ്പ് ഉദ്യോഗസ്ഥർ, ജില്ലാ പോലീസ് മേധാവിമാർ, വരണാധികാരികൾ, ഉപവരണാധികാരികൾ എന്നിവർക്ക് കമ്മീഷൻ കർശന നിർദേശം നൽകിയിരിക്കുകയാണ്.
more news:പച്ചക്കറികൾക്ക് തീ വില, തക്കാളി മുതൽ കൈപ്പക്കയ്ക്കു വരെ വില കുതിച്ചുയരുന്നു
ഉത്തരവിന്റെ ശരിപകർപ്പ് സഹിതം നിശ്ചിത ഫോമിൽ അപേക്ഷിച്ചാൽ പോസ്റ്റൽ ബാലറ്റ് നൽകണമെന്നും നിർദേശിച്ചിട്ടുണ്ട്. ത്രിതല പഞ്ചായത്ത് തിരഞ്ഞെടുപ്പിന് മൂന്ന് പ്രത്യേക അപേക്ഷകൾ (ഗ്രാമം, ബ്ലോക്ക്, ജില്ലാ പഞ്ചായത്ത്) നൽകണം. എന്നാൽ മൂന്നും ഒരു കവറിൽ ആക്കി ഏതെങ്കിലും ഒരു വരണാധികാരിക്ക് നൽകിയാൽ മതി. മുനിസിപ്പാലിറ്റി/കോർപ്പറേഷൻ തിരഞ്ഞെടുപ്പിന് ഒരു അപേക്ഷ മതി. അപേക്ഷ വോട്ടെടുപ്പിന് കുറഞ്ഞത് 7 ദിവസം മുമ്പെങ്കിലും വരണാധികാരിക്ക് ലഭിക്കണം. നേരിട്ട് നൽകുന്നവർ സ്വന്തം ഐഡന്റിറ്റി തെളിയിക്കണം.പോസ്റ്റൽ ബാലറ്റ് സൗകര്യം കൃത്യമായി ലഭ്യമാക്കാൻ എല്ലാ വരണാധികാരിമാർക്കും ജില്ലാ തിരഞ്ഞെടുപ്പ് ഉദ്യോഗസ്ഥർക്കും കമ്മീഷൻ പ്രത്യേക നിർദേശം നൽകി. ഡ്യൂട്ടിയിലുള്ള ഒരു ജീവനക്കാരന്റെയും വോട്ടവകാശം നഷ്ടപ്പെടുത്തരുതെന്നാണ് കമ്മീഷന്റെ നിർദേശം.
