മുക്കം: എടവണ്ണ കൊയിലാണ്ടി സംസ്ഥാന പാതയോരത്ത് കുളങ്ങരയിൽ യുവാവിന് വെട്ടേറ്റ സംഭവത്തിൽ പോലീസ് പിടിയിലായ പ്രതിയെ സംഭവസ്ഥലത്തെത്തിച്ച് തെളിവെടുപ്പ് നടത്തി.സംഭവം നടന്ന സ്വകാര്യ വ്യക്തിയുടെ കെട്ടിടത്തിലും സ്വകാര്യ ആശുപത്രിയിലുമാണ് പ്രതി ശിഹാബുദ്ധീനെ മുക്കം ഇൻസ്പെപെക്ടർ നിസാമിൻ്റെ നേതൃത്വത്തിൽ തെളിവെടുപ്പ് നടത്തിയത്. ചൊവ്വാഴ്ച പകൽ 9.30 ഓടെയാണ് കൊടിയത്തുർ സ്വദേശി സിയാഉൾ ഹഖിന് വെട്ടേറ്റത്. സംഭവം നടന്ന് മിനുട്ടുകൾക്കകം പ്രതി പോലീസ് പിടിയിലാവുകയും ചെയ്തിരുന്നു. ബുധനാഴ്ച രാവിലെ 10 മണിയോടെ കുളങ്ങരയിലെത്തിച്ചായിരുന്നു ആദ്യം തെളിവെടുപ്പ് നടത്തിയത്. സാമ്പത്തിക ഇടപാടുമായി ബന്ധപ്പെട്ട തർക്കമാണ് സംഭവത്തിന് കാരണമായതെന്ന് തെളിവെടുപ്പിനിടെ പ്രതി ശിഹാബുദ്ധീൻ പോലീസിനോട് പറഞ്ഞു. * സംഭവത്തിനിടെ ശിഹാബുദ്ധീനും കൈക്ക് പരിക്കേറ്റിരുന്നു. ഓടത്തെരുവിലെ സ്വകാര്യ ആശുപത്രിയിലെത്തി മുറിവ് ഡ്രസ്സ് ചെയ്തതായും പ്രതി പോലീസിനോട് പറഞ്ഞതിൻ്റെ അടിസ്ഥാനത്തിൽ സ്വകാര്യ ആശുപത്രിയിലും തെളിവെടുപ്പ് നടത്തുകയായിരുന്നു.
കൃത്യം നടത്തിയ ശേഷം സ്വന്തം കാറിൽ രക്ഷപ്പെടുന്നതിനിടെ പോലീസ് അതിസാഹസികമായി പ്രതിയെ പിടികൂടുകയായിരുന്നു. വിവരമറിഞ്ഞ് മുക്കം ഇൻസ്പെക്ടർ എൻ.നിസാമിൻ്റെ നിർദേശപ്രകാരം
എസ്.ഐ അസൈൻ, ഷഫീഖ് നീലിയാനിക്കൽ എന്നിവർ ചേർന്നാണ്സംഭവസ്ഥലത്തേക്ക് പോവുന്നതിനിടെ പ്രതിയെ പിന്തുടർന്ന് പിടികൂടിയത്.
