കോഴിക്കോട് : കോഴിക്കോട്: കോര്‍പ്പറേഷന്‍ തെരഞ്ഞെടുപ്പില്‍ സംവിധായകന്‍ വി.എം വിനു യു.ഡി.എഫ് സ്ഥാനാര്‍ഥി. കല്ലായി 37ാം ഡിവിഷനില്‍ നിന്നാണ് വിനു മത്സരിക്കുക. കെ.പി.സി.സി ജനറല്‍ സെക്രട്ടറി അഡ്വ. പി.എം നിയാസ് പാറോപ്പടി ഡിവിഷനില്‍ മത്സരിക്കും. 15 ഡിവിഷനുകളിലെ സ്ഥാനാര്‍ഥികളെയാണ് ഇന്നലെ പ്രഖ്യാപിച്ചത്. 22 സീറ്റുകളിലെ സ്ഥാനാര്‍ഥികളെ കഴിഞ്ഞ ദിവസം പ്രഖ്യാപിച്ചിരുന്നു.
രാഷ്ട്രീയത്തിനപ്പുറം പൊതുസമൂഹം അംഗീകരിക്കുന്ന വ്യക്തിയാവണമെന്ന ചിന്തയാണ് സംവിധായകന്‍ വി.എം വിനുവിലേക്ക് എത്തിയതെന്ന് ഡിസിസി പ്രസിഡന്റ് അഡ്വ.കെ പ്രവീണ്‍കുമാര്‍ പറഞ്ഞു. വ്യക്തികളുടെ മുഖമല്ല കോര്‍പ്പറേഷന്റെ മോചനമാണ് ജനം ആഗ്രഹിക്കുന്നതെന്നും ഇത്തവണ കോഴിക്കോട് കോര്‍പ്പറേഷന്‍ തിരിച്ചുപിടിക്കുമെന്നും എം.കെ രാഘവന്‍ എംപി പറഞ്ഞു. കോണ്‍ഗ്രസ് 49, മുസ്ലിം ലീഗ് 25, സിഎംപി 2 എന്നിങ്ങനെ മൊത്തമുളള 76 സീറ്റിലേക്കാണ് മത്സരിക്കുന്നത്. വാര്‍ത്താസമ്മേളനത്തില്‍ കെപിസിസി ജനറല്‍ സെക്രട്ടറിമാരായ അഡ്വ.പി.എം നിയാസ്, അഡ്വ.കെ ജയന്ത്, രാഷ്ട്രീയകാര്യസമിതി അംഗം എന്‍. സുബ്രഹ്‌മണ്യന്‍, മുന്‍ ഡിസിസി പ്രസിഡന്റ് കെ.സി അബു തുടങ്ങിയവര്‍ പങ്കെടുത്തു.
ഡിവിഷന്‍ നമ്പറും പേരും സ്ഥാനാര്‍ഥികളും
1 എലത്തൂര്‍ ലത കളങ്കോളി, 5 മൊകവൂര്‍ കെ.സായിഷ്, 3 എരഞ്ഞിക്കല്‍ വൈശാല്‍ കല്ലാട്ട്, 12 പാറോപ്പടി പി.എം.നിയാസ്, 13 സിവില്‍ സ്റ്റേഷന്‍ പി.എം.ജീജാബായ്, 15 വെള്ളിമാടുകുന്ന് സ്വപ്ന മനോജ്, 21 ചേവായൂര്‍ പുതുശ്ശേരി വിശ്വന്‍, 26 പറയഞ്ചേരി അജന ജനാര്‍ദ്ദനന്‍, 27 പുതിയറ ഷേര്‍ളി ജോണ്‍ പ്രമോദ്, 35 മാങ്കാവ് മനക്കല്‍ ശശി, 37 കല്ലായ് വി.എം.വിനു, 61 പാളയം അന്‍വാറ തെക്കോത്ത്, 62 മാവൂര്‍ റോഡ് ആശ ജയപ്രകാശ്, 65 എരഞ്ഞിപ്പാലം സി.പി.സലീം, 74 എടക്കാട്എന്‍.വി.അഞ്ജന
