ആലപ്പുഴ : പൊതുവിദ്യാലയങ്ങളിൽ സ്പെഷൽ എജുക്കേറ്റർ തസ്തിക സൃഷ്ടിക്കണമെന്ന സുപ്രീം കോടതി വിധി നടപ്പാക്കണമെന്ന് ആവശ്യപ്പെട്ട് കേരള പിറവി ദിനത്തിൽ സ്പെഷൽ എജുക്കേറ്റർ ന്മാർ മുഖ്യമന്ത്രി പിണറായി വിജയനും വിദ്യാഭ്യാസമന്ത്രി വി. ശിവൻകുട്ടിക്കും ഇ മെയിൽ സന്ദേശം അയച്ചു . സുപ്രീം കോടതി വിധി വന്നിട്ട് എട്ട് മാസമായെന്ന് നിവേദനത്തിൽ ചൂണ്ടി കാട്ടി . വിദ്യാലയങ്ങളിൽ സ്പെഷൽ എജുക്കേറ്റർ നിയമനത്തിന് പണമില്ലെന്ന് വ്യക്തമാക്കി സംസ്ഥാന സർക്കാർ സുപ്രിം കോടതിയിൽ സത്യവാങ്മൂലം നൽകിയ സാഹചര്യത്തിലാണ് അധ്യാപകർ നിവേദനം നൽകിയത്. സ്പെഷൽ എജുക്കേറ്റർ തസ്തിക സൃഷ്ടിക്കാൻ പൊതു വിദ്യാല യങ്ങളിൽ ഭൗതിക സംവിധാനങ്ങളില്ലെന്നും സത്യവാങ്മൂലത്തിൽ പറഞ്ഞിരുന്നു. ഇതേ തുടർന്ന്, വിഷയത്തിൽ കേന്ദ്ര സർക്കാരിൻ്റെ അഭിപ്രായം അറിയാൻ കേസ് നവംബർ നാലിന് വീണ്ടും പരിഗണിക്കും. രാജ്യത്തെ മുഴുവൻ പൊതുവിദ്യാലയങ്ങളിലും ഭിന്നശേഷി കുട്ടികൾക്ക് പഠന പിന്തുണ നൽകാനായി സ്പെഷൽ എജുക്കേറ്റർ തസ്തിക സൃഷ്ടിക്കണമെന്ന് കഴിഞ്ഞ മാർച്ച് ഏഴിനാണ് സുപ്രീം കോടതി ഉത്തരവിട്ടത്. കോടതി ഉത്തരവ് പ്രകാരം 20 സംസ്ഥാനങ്ങളിൽ തസ്തിക നിർണയം പൂർത്തിയായിട്ടുണ്ട്. നിലവിൽ താൽക്കാലികാടിസ്ഥാനത്തിൽ പ്രവർത്തിക്കുന്ന സ്പെഷൽ എജുക്കേറ്റർന്മാരെ തസ്തിക സൃഷ്ടിച്ച് സ്ഥിരപ്പെടുത്തണമെന്ന് സുപ്രീം കോടതി നിർദ്ദേശിച്ചിരുന്നു . സംസ്ഥാനങ്ങളിൽ പൊതുവിദ്യാഭ്യാസ സെക്രട്ടറി, ആർ.സി. ഐ പ്രതിനിധി , ഭിന്ന ശേഷി കമ്മീഷണർ എന്നിവരെ അംഗങ്ങളാക്കി സ്ക്രീനിങ് കമ്മിറ്റി രൂപവത്ക്കരിച്ച് നിയമന നടപടികൾ 12 ആഴ്ചകൾക്കകം പൂർത്തികരിക്കാനായിരുന്നു കോടതി ഉത്തരവ് . എന്നാൽ, പേരിന് സ്ക്രീനിങ് കമ്മിറ്റി രൂപവത്ക്കരണം നടന്നെങ്കിലും തസ്തിക നിർണയത്തിലേക്ക് കടക്കാൻ കേരളത്തിൽ
പൊതുവിദ്യാഭ്യാസ വകുപ്പ് തയ്യാറായിട്ടില്ല. നിലവിലുള്ള താത്ക്കാലിക സ്പെഷൽ എജുക്കേറ്റർ ന്മാരെ കരാർ അടിസ്ഥാനത്തിൽ ‘സ്ഥിര’പ്പെടുത്താമെന്ന വിചിത്ര സത്യവാങ്മൂലം ഓഗസ്റ്റിൽ കേരളം സമർപ്പിച്ചിരുന്നു.കരാർ നിയമനവും തസ്തിക സൃഷ്ടിച്ചുള്ള നിയമനവും രണ്ടാണെന്ന് സ്പെഷൽ എജുക്കേറ്റർ ന്മാർ കോടതിയിൽ എതിർ വാദമുന്നയിച്ചു. 2724 സ്പെഷൽ എജുക്കേറ്റർ ന്മാരാണ് സംസ്ഥാനത്ത് എസ്.എസ്. കെ പദ്ധതിയിൽ കരാർ അടിസ്ഥാനത്തിലുള്ളത്. 60 : 40 അനുപാതത്തിൽ കേന്ദ്ര – സംസ്ഥാന ഫണ്ട് വിനിയോഗമുള്ള കേന്ദ്രാവിഷ്കൃത പദ്ധതിയാണ് എസ്.എസ്. കെ.
രണ്ട് വർഷമായി പദ്ധതിയുടെ കേന്ദ്ര വിഹിതം ലഭിക്കുന്നില്ല . പി. എം. ശ്രീ പദ്ധതി മരവിപ്പിക്കുന്നതോടെ ലഭിക്കാനുള്ള 1200 കോടി നഷ്ടമാകാനാണ് സാധ്യത.
10 വർഷമായി ശബള വർദ്ധനയില്ല
ആലപ്പുഴ : സ്പെഷൽ എജുക്കേറ്റർ ന്മാർക്ക് 10 വർഷമായി വേതനം വർദ്ധിപ്പിച്ചിട്ടില്ല. ആറ് വർഷം മുമ്പ് സെക്കണ്ടറി സ്പെഷൽ എജുക്കേറ്റർ ന്മാരുടെ വേതനം 3815 രൂപയും എലമെൻ്ററി അധ്യാപകരുടെത് 2000 രൂപയും വെട്ടിക്കുറച്ചിരുന്നു. അവഗണനക്കെതിരെ അധ്യാപകരിൽ പ്രതിഷേധമുയർന്നിട്ടുണ്ട്.
സമരത്തിനിറങ്ങും – സെഫ് കെ
ആലപ്പുഴ :
സ്പെഷൽ എജുക്കേറ്റർ തസ്തിക സൃഷ്ടിക്കണമെന്ന സുപ്രീം കോടതി ഉത്തരവ് എട്ടു മാസമായി നടപ്പാക്കാത്തതിനാൽ സമരത്തിനിറങ്ങേണ്ട അവസ്ഥയിലാണെന്ന് സ്പെഷൽ എജുക്കേറ്റേഴ്സ് ഫെഡറേഷൻ ഓഫ് കേരള (സെഫ് കെ) സംസ്ഥാന പ്രസിഡൻ്റ് കെ.വി .അനൂപ് പറഞ്ഞു. 2022 ലാണ് രജ്നീഷ് കുമാർ പാണ്ഡെ കേസിൽ സുപ്രീം കോടതിയിൽ സെഫ് കെ കക്ഷി ചേർന്നത്. അധ്യാപകർക്ക് നീതി ലഭിക്കും വരെ നിയമ പോരാട്ടം തുടരുമെന്നും അദ്ദേഹം പറഞ്ഞു.
